Qasıetti Ramazan aıynda aýyzashar berip, saýap jınaýdy murat etken jandardyń búginde qarasy kóbeıip kele jatqany sońǵy jyldary anyq baıqalýda. Sondaı jandardyń qoldaýymen halyqqa aýyzashar berýdi dástúrge aınaldyrǵan «Áziret Sultan» meshiti taıaýda Astanadaǵy buqaralyq aqparat quraldary ókilderiniń basyn qosyp, taǵy bir saýapty sharaǵa muryndyq boldy.
Aýyzasharǵa 400-ge tarta buqaralyq aqparat quraldary ókilderimen birge, elge tanymal azamattar da qatysty. Quranmen bastalǵan keshte «Áziret Sultan» meshitiniń bas ımamy Qaırat Joldybaıuly sóz alyp, aýyzashardyń shymyldyǵyn ashty. «Bizdiń jasap jatqan jumystarymyzdy, ımamdarymyzdyń ýaǵyzdaryn elimizdiń túkpir-túkpirine jetkizetin sizdersizder», dep sózin bastaǵan Qaırat Joldybaıuly bul dastarqan BAQ ókilderiniń din nasıhaty úshin atqarǵan jumystaryna alǵys retinde jasalyp otyrǵanyn aıtty. «Qasıetti Ramazan aıyn jan-jaqty nasıhattap, halyqqa kerekti aqparat berip otyrsyzdar. Bul da dinimizdiń órkendeýine úlken kómek. Alla razylyǵy úshin dep aq kóńilmen jaıylǵan aq dastarqanymyzǵa adal nıetpen kelip otyrǵandaryńyzǵa myń da bir alǵys», – dedi Q. Joldybaıuly.
Sondaı-aq, bas ımamnyń aıtýynsha, «Aýyzasharǵa úles qos» aksııasynyń arqasynda «Áziret Sultan» meshiti kún saıyn 400 adamǵa aýyzashar berse, áleýmettik jaǵdaıy tómen otbasylardyń balalaryn mektepke daıyndaý aksııasyna da úles qosatyn jandardyń tabylatynyn jetkizdi.
Aýyzasharda elimizge belgili ánshiler men termeshiler halyqty dinı ándermen sýsyndatty. Kesh sońynda qonaqtarǵa kádesyı retinde dinı kitaptar úlestirildi.
Almas MANAP,
«Egemen Qazaqstan».
