Shymkenttegi Turar Rysqulovtyń eskertkishine gúl shoqtaryn qoıýdan bastalǵan jıyn barysynda qatysýshylarǵa ulty úshin uran tastap, elimizdiń saıası damýyna atsalysqan, túrki halyqtarynyń rýhanı birligin saqtaýǵa jáne táýelsizdik ıdeıasyn bastaǵan tulǵanyń ómir jolynan syr shertetin arnaıy kórme tanystyryldy. Derekti fılm kórsetildi. Konferensııaǵa elimizben qatar alys-jaqyn shet memleketterden ǵalymdar men tarıhshylar qatysty. Sondaı-aq uly tulǵanyń nemeresi Máskeý qalasynan Vladımır Rysqulov pen Almatydan Adel Rysqulova arnaıy keldi. «Elimizdiń Tuńǵysh Prezıdenti – Elbasy N.Nazarbaevtyń «Bolashaqqa baǵdar: rýhanı jańǵyrý» jáne «Uly Dalanyń jeti qyry» atty baǵdarlamalyq maqalalaryn iske asyrý aıasynda uıymdastyrylǵan konferensııanyń negizgi maqsaty Turar Rysqulovtyń eńbegin tanytý. Qazaqstannyń negizin qalaýshylardyń biri, ónerkásip, bilim salalalaryn damytýǵa atsalysqan uly tulǵa ekenin keıingi urpaq bilýi tıis», - deıdi M.Áýezov atyndaǵy OQMÝ rektory Darııa Qojamjarova. Al «Dúnıejúzi qazaqtarynyń qaýymdastyǵy» uıymy tóraǵasynyń birinshi orynbasary Zaýytbek Turysbekov: «T.Rysqulovtyń elimizdiń qalyptasýyna, damýyna qosqan úlesi orasan. Sondaı-aq ol Mońǵolııanyń Konstıtýsııasyn jazǵan. Mońǵoldar Rysqulov dese bas ıedi. 1400 shaqyrym Túriksib temirjolyn salý máselesin de sheship bergen», - dedi.
Konferensııada elimizdiń áleýmettik-ekonomıkalyq jaǵdaıyn qalyptastyrýdaǵy Turar Rysqulovtyń róli men orny, HH ǵasyrdyń qazaq ıntellıgensııasynyń kózqarastarynda táýelsizdik úshin kúres jáne Túrkistannyń saıası damýynyń mańyzdylyǵy, jalpy Qazaqstan men Ortalyq Azııanyń halyqaralyq deńgeıdegi sapaly ǵylymı zertteýleriniń jańa baǵyttary men yntalandyrylýy, Eýrazııanyń mádenı-tarıhı murasy úshin Túrki áleminiń qundylyqtary boıynsha jańa ǵylymı zertteýler tanystyryldy. Búgingi urpaqqa uly tulǵanyń taǵlym bolarlyq isteri dáripteldi. Sondaı-aq OQMÝ ǵalymdary «Muhtartaný» ǵylymı ortalyǵymen birlesip, O.Qońyratbaevtyń «Turar jáne Túrkistan» atty monografııasyn daıyndap shyǵarypty. T.Rysqulovtyń 125 jyldyǵyn atap ótýge tyńǵylyqty daıyndalǵan oqý ordasy 100-den astam ǵalymdardyń ǵylymı maqalalaryn «Qazaqtaný» jýrnalynda jarııalaǵan. Odan bólek, kemeńger tulǵany dáripteýge arnalǵan arnaıy baıqaý da uıymdastyryldy.
