Qazaq tarıhyn, ulttyq salt-dástúrlerdi, tarıhı-mádenı sabaqtastyqty dáripteýdi maqsat tutqan basqosýdy Qyzdar ýnıversıtetiniń Ǵylymı jumystar jáne ınnovasııa jónindegi prorektory Nurǵalı Arshabekov ashyp, rektor Gaýhar Aldambergenovanyń konferensııa qatysýshylaryna joldaǵan quttyqtaý hatyn oqyp berdi.
Onlaın jelisinde ótken jıynǵa, ǵalymdar, ǵylymı-zertteý ınstıtýttarynyń ókilderi, professorlar álem tarıhynyń ortaǵasyrlyq kezeńindegi saıası, tarıhı, mádenı jáne geografııalyq jaǵdaılarǵa qatysty zerteýlerimen bólisti. Tarıh ǵylymdarynyń doktory, professor Bereket Káribaev Qazaqstan aýmaǵyndaǵy birneshe myńjyldyq tarıhı jáne memlekettiliktiń damýdyń keıingi orta ǵasyrlardaǵy kórinisi bolǵan Qazaq handyǵynyń qurylýymen «qazaq» etnosy da ómirge keldi. Qazaq handyǵy ózi ómir súrgen dáýirdiń alǵashqy kezeńderinde etnostyń etnıkalyq aýmaǵyn qalyptastyrdy jáne keıingi kezeńderde ony saqtaı bildi. Osy jolda memlekettiń tizginin ustaǵan handar ózderiniń jeke bastaryndaǵy erekshe qasıetteri men qabiletteri arqasynda ártúrli qıynshylyqtarǵa qaramastan qıynnan jol taýyp, Qazaq eli men halqyn jańa zamannyń tabaldyryǵyna deıin jetkizdi, dep atap ótse – dedi óz sózinde. Sh.Ýálıhanov atyndaǵy Tarıh jáne etnologııa ınstıtýty dırektorynyń orynbasary Áýezhan Shashaev «Uly dalanyń uly esimderi» mýltımedııalyq veb-portalymen tanystyrdy. Tarıhshynyń pikirinshe, Elbasynyń «Uly dalanyń jeti qyry» maqalasynda ulttyq tarıhymyzdy zertteýge zor serpin berilgen. Máselen, arheografııalyq ekspedısııa Ombydan úsh jarym myńnan astam tyń derekterdi elge ákelgen. 1934 jyly «qupııa saqtalsyn» dep mór basylǵan qujattar qazaq eliniń XVII-XIX ǵasyrdaǵy ómirinen jáne Abylaı handyǵy týraly málimetter beredi. Qazaq, aǵylshyn jáne orys tilinde jarııalanatyn mýltımedııalyq portalǵa ázirge 100 tulǵanyń esimi engiziledi. Portal áýeli Tarıh jáne etnologııa ınstıtýtynyń saıtynda, keıinnen jeke portal bolyp ashylyp, qazaq tarıhynda erekshe orny bar tulǵalar týraly derektermen tolyqtyrylatyn bolady.
Konferensııa barysynda «Vaınah» assosıasııasynyń tóraǵasy Abý-Kasım Hajalıev, Mońǵolııa ýnıversıtetiniń PhD doktoranty Ýrýgmyl jáne tarıh ǵylymdarynyń kandıdaty Erdáýlet Berlibaev sóz sóılep, qazaq tarıhy týraly tyń derekterimen bólisti.
