Ol on bes jasynda-aq komsomol qataryna ótip, onyń tómengi býyndarynda jumys isteı bastady. Bir top qazaq jastary, komsomol aktıvteri bolyp 1922 jyly Máskeýdiń Shyǵys eńbekshileriniń kommýnıstik ýnıversıtetine (KÝTV) oqýǵa attanady. Talantty jas oqı júrip, komsomol jumysyna belsene qatysady. Bilim alýdy eńbekpen ushtastyryp, SSSR halyqtary Ortalyq baspasynda qazaq seksııasynyń jumysyn basqarady. Sol jerden Orta Azııadaǵy Ferǵana maıdanyna attanady, basmashylarǵa qarsy kúreske qatysady.
1925 jyldan bastap respýblıkamyzdaǵy pedagogtik, jýrnalıstik, partııalyq jumystarǵa belsene aralasady. Jetisý gýbernııalyq partııa-sovet mektebinde, Almaty pedagogıka tehnıkýmynda, Orta Azııa memlekettik ýnıversıtetinde, qazaq memlekettik ýnıversıtetinde ǵylymı, jaýapty pedagogıkalyq qyzmetterde bolady. 1933 jyly partııa Arystanovty Áýlıeata aýdanyna (qazirgi Jambyl oblysy) Maıtóbe et-sút sovhozy saıası bóliminiń bastyǵy etip jiberedi. Osy jerde ol sharýashylyqtyń ósip-órkendeýine eleýli úles qosady. Eńbegi baǵalanyp, kelesi jyly Lenın ordenimen nagradtalady.
J.Arystanov munan keıin Almatydaǵy Marksızm-lenınızm ınstıtýty dırektorynyń orynbasary ári bas redaktory bolyp istep, orys klassıkteriniń shyǵarmalaryn qazaq tiline aýdarý jáne basyp shyǵarý isine laıyqty úles qosty. Ol qazaqstan ólkelik partııa komıtetinde bólim meńgerýshisiniń orynbasary boldy.
Onyń jýrnalıstik qyzmetiniń ózi bir tóbe. Shymkent, Jetisý gýbernııalyq gazetteri, “Aýyl kommýnısi” jýrnaly redaktorynyń orynbasary qyzmetterin atqardy. 1937 jyldyń sáýirinen 1938 jyldyń maýsymyna deıin “Sosıalıstik Qazaqstan” gazetiniń redaktory bolyp istedi. Osy jyldar ishinde ol Qazaqstan Kommýnıstik partııasy Ortalyq Komıtetiniń múshesi jáne Ortalyq Komıtet bıýrosynyń músheligine kandıdat bolyp saılanady.
J.Arystanovtyń “Jalyndy júrek”, keıin “Tań juldyzy” degen atpen óńdep, tolyqtyryp shyǵarǵan kitaptary respýblıka jastar uıymynyń ómirine, onyń jalyndy uıymdastyrýshysy jáne jetekshisi Ǵanı Muratbaevtyń ómiri men qoǵamdyq qyzmetine arnalǵan. Al “Suńqar da jerdi mekendeıdi” degen derekti povesi halqymyzdyń qalaýly uldarynyń biri – Oraz Jandosovtyń ómiri men qyzmetin baıandaıdy. “Esten ketpes esimder” atty estelikterinde respýblıkanyń kórnekti adamdarynyń, belgili qaıratkerleriniń ósý, qalyptasý joldaryn el ómirimen tyǵyz ushtastyra kórsetedi.
J.Arystanov 1992 jyly qaıtys boldy.
