Vedomstvo ókili aıtqandaı, elimizdiń áleýmettik-ekonomıkalyq ahýalyn jaqsartýda sıfrly tehnologııalardyń mańyzy zor. Bul forým osy baǵytta jetistikke jetken memlekettermen tájirıbe almasyp, tyń usynystar jasalatyn biregeı alań. Tehnokratııalyq jolǵa túsý úshin áýeli memlekettik sıfrly saıasatty aıqyndaý qajet. Sol sebepti Úkimet «Sıfrly Qazaqstan» baǵdarlamasyn bekitti.
– Elbasynyń bastamasymen «Sıfrly Qazaqstan» baǵdarlamasy ázirlendi. Onyń kómegimen ekonomıkadan bastap, memlekettik qyzmet kórsetýdi, joǵary jyldam ári qorǵalǵan telekommýnıkasııalyq ınfraqurylymdy sıfrlandyrý kózdelgen. Álbette, baılanys tehnologııalary bir orynda turmaıtyny belgili. Qazir álemde 5G ınternetti engizýge baılanysty pikirtalas qyzý órbip jatyr. Jýyrda Mysyrdyń Sharm-ál-Sheıh qalasynda osy máselege arnalǵan aýqymdy konferensııa da ótti. 5G ulttyq ekonomıka men «aqyldy qalalardyń» órkendeýine, sol sekildi tyń mamandyqtarǵa jol ashatyny shúbásiz. Bir adamǵa shaqqanda Qazaqstan mobıldi trafıkti belsendi qoldanatyn elderdiń qatarynda. Osyǵan qarap halyqtyń joǵary jyldam ınternetke suranysyn baǵamdaı berýge bolady. Bıyl osy tehnologııany synaqtan ótkizý jumystary atqaryldy. Atap aıtqanda, Nur-Sultan jáne Almatyda 5G tehnologııasynyń múmkindikteri pysyqtaldy. 5G tek baılanys júıesimen shektelmeıdi. Bul sonymen birge telemedısına, ónerkásiptik sıfrlandyrý, ushqyshsyz basqarylatyn kólik quraldaryn basqarý syndy jan-jaqty baǵyttardy qamtıdy, – dedi D.Tuıaqov.
Úshinshi jyl qatarynan uıymdastyrylǵan halyqaralyq sharada 20-dan asa spıker aqparattyq tehnologııa salasyndaǵy jańalyqtarmen bólisip, 20 memleketten kelgen myńǵa tarta meıman Qazaqstandaǵy sıfrlandyrý baǵytyndaǵy jumystarmen tanysty. Forýmda memlekettik qyzmetter, ónerkásip, agroónerkásiptik keshen, turǵyn úı-kommýnaldyq sharýashylyq salalaryn sıfrlandyrý, «Sıfrly Qazaqstan» jáne Indýstrııa 4.0 memlekettik baǵdarlamalaryn júzege asyrýda yntymaqtastyq ornatýdyń joldary qarastyryldy. Budan bólek forým qatysýshylary elimizdegi alǵashqy «aqyldy qala» Aqkólge barady.
