Keshe Qazaqstan Prezıdenti janyndaǵy Ortalyq kommýnıkasııalar qyzmetiniń resmı ókili Altaı Ábıbýllaevtyń qatysýymen jýrnalısterge arnalǵan kezekti brıfıng ótti. Resmı ókil óz sózinde aǵymdaǵy aptada ótetin mańyzdy is-sharalarmen tanystyrdy.
Keshe Qazaqstan Prezıdenti janyndaǵy Ortalyq kommýnıkasııalar qyzmetiniń resmı ókili Altaı Ábıbýllaevtyń qatysýymen jýrnalısterge arnalǵan kezekti brıfıng ótti. Resmı ókil óz sózinde aǵymdaǵy aptada ótetin mańyzdy is-sharalarmen tanystyrdy.
Altaı Ábıbýllaev Iran basshylyǵynyń shaqyrýy boıynsha, Memleket basshysy Nursultan Nazarbaev 4 tamyzda Iran Islam Respýblıkasynyń jańadan saılanǵan Prezıdenti Hasan Roýhanıdi ulyqtaý rásimine qatysatynyn, saltanatty sharaǵa basqa da shet memleketterdiń basshylary, úkimetter jáne parlamentter spıkerleri shaqyrylyp otyrǵanyn, Teheranda Nursultan Nazarbaev Irannyń jańa Prezıdenti Hasan Roýhanımen ekijaqty kezdesý ótkizetinin atady.
Qazaqstan men Iran Kaspıı jaǵalaýyndaǵy memleketter retinde Kaspıı teńiziniń quqyqtyq mártebesin anyqtaý jónindegi kelissóz prosesine qatysatyny belgili. Bul rette, bizdiń elimiz óńirdiń barlyq elderimen dostyq jáne áriptestik qarym-qatynasta jáne saýda-ekonomıkalyq baılanystardy ári qaraı keńeıtýdi qoldaıtyny da aıan. «Biz Iran ıadrolyq baǵdarlamasynyń tóńiregindegi máselelerdi beıbit jáne dıplomatııalyq jolmen retteýdiń mańyzdylyǵyn o bastan aıtyp kelemiz. Qazaqstannyń shaqyrýy boıynsha aǵymdaǵy jyldyń aqpan jáne sáýir aılarynda Almatyda Iran ıadrolyq baǵdarlamasy boıynsha «5+1» pishinindegi kelissózderdiń eki kezeńi ótti», dedi resmı ókil.
Úkimet jelisi boıynsha ótetin is-sharalarǵa toqtalǵan Altaı Ábıbýllaev Qyzylorda oblysynyń damý jaǵdaıymen tanysý maqsatynda 1 tamyz kúni Premer-Mınıstrdiń birinshi orynbasary – О́ńirlik damý mınıstri Baqytjan Saǵyntaevtyń atalmysh óńirge jumys sapary josparlanyp otyrǵanyn aıtty. Vıse-premer sapar aıasynda Kókaral bógetin, Aral balyq óńdeý zaýytyn, óńirdiń basqa da áleýmettik mańyzdy sharýashylyq nysandaryn aralamaq. Sondaı-aq Premer-Mınıstrdiń birinshi orynbasary Baqytjan Saǵyntaev, Qorshaǵan ortany qorǵaý mınıstri Nurlan Qapparov, Ulttyq ǵarysh agenttiginiń tóraǵasy Talǵat Musabaev jáne basqalar «Proton-M» zymyran tasyǵyshy qulaǵan jerde bolyp, ondaǵy jaǵdaıdy óz kózderimen kórip qaıtady. Baıqońyr qalasynda osy apattyń saldaryn joıý jónindegi komıssııanyń jumys qorytyndysyna arnalǵan keńes ótkiziledi dep josparlanýda.
Brıfıng barysynda Qazaqstan Respýblıkasynyń aýdandyq mańyzy bar qalalary, aýyldyq okrýgteri, aýyldyq okrýgterdiń quramyna kirmeıtin kentteri men aýyldary ákimdigine kandıdattardy usyný aıaqtalǵannan keıin, 24 shildede kandıdattar úgit-nasıhat sharalaryna kiriskeni, Qazaqstan boıynsha barlyǵy 2 457 ákim saılanatyny, bul elimizdegi barlyq ákimderdiń 91,5% quraıtyny aıtyldy. Ortalyq Kommýnıkasııalar qyzmeti resmı ókiliniń habarlaýynsha, respýblıka boıynsha usynylǵan 7173 úmitkerden ákimdikke kandıdattar retinde 7018 adam tirkelipti. Al saılaý 5-9 tamyz aralaǵynda ótedi.
Bul kúngi jıynǵa «Astana EKSPO-2017» ulttyq kompanııasynyń Kommýnıkasııalar jáne marketıng departamentiniń dırektory Ásel Qojaqova da qatysyp, EXPO-2017-niń jańa logotıpi úshin daýys berýdiń nátıjelerin jarııalady. Onyń aıtýyna qaraǵanda, bul ulttyq joba bolyp tabylatyndyqtan, jańa logotıp tańdaý quqyǵyn qazaqstandyqtardyń ózderine qaldyrýǵa sheshim qabyldanǵan. «Budan buryn belgili bolǵanyndaı, 9 ben 22 shilde kúnderi aralyǵynda «Astana EKSPO-2017» UQ» AQ-tyń saıtynda EKSPO-2017 halyqaralyq mamandandyrylǵan kórmesiniń jańa logotıpi úshin halyqtyq daýys berýi ótti. Tórt aı boıy 18 eldiń 27 dızaınerleri EKSPO-2017 kórmesiniń jańa beınelemesin jasaǵan bolatyn, barlyǵy 56 logotıp daıyndaldy. Onyń ishinde eń úzdik degen jeteýi iriktelip, halyq nazaryna usynyldy. EKSPO-2017 halyqaralyq mamandandyrylǵan kórmesin daıyndaý men ótkizý jónindegi Memlekettik komıssııanyń sheshimimen EKSPO-2017 halyqaralyq mamandandyrylǵan kórmesiniń jańa fırmalyq belgisi retinde «Jel energııasy» logotıpi bekitildi», dedi Ásel Qojaqova.
Al brıfıngke qatysqan «QazAgro» ulttyq basqarýshy holdıng» AQ basqarma tóraǵasynyń orynbasary Dáýren Maqajanov holdıngtiń agroónerkásiptik keshendi ındýstrııalyq damytýdy yntalandyrý baǵytyndaǵy memlekettik saıasatymen, nesıelendirý, otandyq óndiriske, aýyldaǵy shaǵyn jáne orta bızneske kórsetiletin qoldaý sharalarymen tanystyrdy.
Láıla EDILQYZY,
«Egemen Qazaqstan».
