Qyzylorda qalasyna kele qalsańyz, qaınaǵan tirshilikke kýá bolasyz. Kósheler kúrdeli jóndelip, jaryq baǵanalary jańartylyp, sý jańa aıaldamalar qoıylyp jatqanyn kóresiz. Buryn da qala kóriksiz emes edi. Degenmen, sońǵy aılarda qalanyń damýy jańasha sıpatqa engenin baıqaımyz.
Qyzylordanyń kósheleri qalaı jóndelip jatyr? Oǵan qansha qarjy bólindi? Jaryq baǵanalaryn barlyq kóshelerge ornata ma? Qala ortalyǵyndaǵy aıaldamalardyń qanshasy jańartylady?
«Egemen Qazaqstan» gazetiniń Qyzylorda oblysyndaǵy menshikti tilshisi Erjan Baıtiles qala ákimi Nurlybek Nálibaevqa:
– Siz buǵan ne deısiz?
– Jalpy, Qyzylorda qalasynda uzyndyǵy 612 shaqyrymdy quraıtyn 765 kósheniń 535-i asfalttanǵan. Al 138 kóshege tas jol tóselse, qalǵan 92-si qara jol sanatynda. Bıyl qala kósheleriniń joldary jańasha sıpatqa ıe bolyp otyr. Aımaq basshysy Qyrymbek Eleýulynyń tikeleı qoldaýymen respýblıkalyq jáne jergilikti bıýdjetten 5 mıllıard 241,8 mıllıon teńge bólinip, oǵan jalpy uzyndyǵy 89,5 shaqyrymdy quraıtyn 73 kóshege qaıta jańǵyrtý, kúrdeli jáne ortasha jóndeý jumystary júrgizilýde. Sonymen qatar, qalalyq bıýdjetten bólingen 95 mıllıon 167 myń teńgege 70 kósheniń joldary aǵymdaǵy jóndeýden ótkizilmek. Búgingi kúnge deıin uzyndyǵy 27,5 shaqyrym bolatyn 24 kóshege kúrdeli, qaıta jańǵyrtý jáne ortasha jóndeýden ótti. Sondaı-aq, 46 kóshege aǵymdaǵy jóndeý jumystary júrgizildi. Budan bólek, áýejaıdan qalaǵa deıingi joldar kúrdeli jóndeýden ótkizilip, jaryqtandyrylyp jatyr. Al qaladaǵy ortalyq jol bolyp sanalatyn Jibek joly kóshesi alty jolaqty dańǵylǵa aınalyp, keńeıtilý ústinde. Qazir bul joldarda eýropalyq standartqa saı qıyrshyq tasty-mastıkalyq asfalt-beton dep atalatyn sońǵy qabaty salynyp jatyr.
Bıyl qalalyq bıýdjetten baǵdarshamdardyń joba-smetalyq qujattaryn qaraýǵa tıisti qarjy berilip, búgingi kúni jańa úlgidegi 31 baǵdarsham ornatýǵa qalalyq bıýdjetten 417 mıllıon 300 myń teńge bólindi. Sonymen qatar, jol belgilerine 8 mıllıon 600 myń teńge jáne jol syzyqtaryna 20 mıllıon 694 myń teńge qarastyryldy.
Qalada abattandyrý jumystary qarqyn aldy. Osy jyly qalalyqtardyń ózekti máseleleriniń biri – jaıaý júrginshiler jolyn salýǵa oblystyq, qalalyq bıýdjetten 923 mıllıon teńge bólindi. Atalǵan qarjyǵa 24,3 shaqyrymdy quraıtyn 20 kóshege jaıaý júrginshiler joly salynyp, 37 kóp qabatty turǵyn úıdiń aýlaishilik jaıaý júrginshi joldary men avtoturaqtary jóndeýden ótkizilýde. Qazirgi ýaqytta bul jumystar 50 paıyzǵa oryndaldy. Sonymen qatar, respýblıkalyq jáne jergilikti bıýdjetterden bólingen 537 mıllıon 900 myń teńgege qalada uzyndyǵy 52,2 shaqyrymdy quraıtyn 43 kóshe jaryqtandyrylyp otyr. Bul is tek qalamen shektelmeıdi. Qalaǵa qaraıtyn aýyldarda da 37 kóshege jańa jaryq baǵanalary ornatylyp jatyr.
Abattandyrý jumystarynda kópqabatty turǵyn úı aýlalarynda 23 balalar sport alańy salynyp, qazirgi zaman talabyna saı 50 jerge avtobýs aıaldamalary ornatylýda.
QYZYLORDA.
