Búgingi kúni bilim berý júıesi múmkindigi shekteýli balalardyń muqtajdyǵyna áli de bolsa osal beıimdelgen. Osy olqylyqty joıý maqsatynda oblysta elimizde alǵashqy bolyp ınklıýzıvti bilim berýdi damytý boıynsha úılestirý keńesi quryldy. Jalpy bilim beretin mektepterinde ınklıýzııa synyptary ashylýda.
Oblys boıynsha 426 mektepte ınklıýzııa synyptary bar. Onyń biri №19 orta mektep. Bilim oshaǵynda múmkindigi shekteýli 89 oqýshy bilim alýda. Arnaıy korreksııalyq 5 synyp bar. Munda balalardy 5 synypqa deıin ınklıýzııa synyptarynda daıyndaıdy. Ol úshin bilim oshaǵynda ınklıýzıvti bilim berýdi damytý boıynsha resýrstyq ortalyq qurylǵan. Arnaıy mamandar toby da jasaqtalypty. Iаǵnı, logoped, defektolog pen psıholog mamandar birlese jumys isteıdi.
–Erekshe qajettilikteri bar balalar sany 89. Olardyń ishinde estý, kórý kemistikteri bar, tirek-qımyl apparaty, psıhıkalyq damýynyń tejelýi bar balalar bar. Mektepte mamandar jumys isteıdi. Muǵalimder biliktilikterin jetildirip otyrady. Inklıýzıvti orta bizdiń mektepte qalyptasqan dep aıtýǵa bolady, deıdi defektolog Ilııas Janǵalı.
Aqmola oblysyndaǵy bilim berý mekemelerinde kedergisiz orta qalyptastyrý ózekti máselelerdiń birinen sanalady. Búginde óńirdegi 736 memlekettik bilim berý mekemesine pandýstar ornatý qajet. Bıyl 906 myń teńgege 16 uıymǵa pandýstar men kótergishter ornatylsa, 2020 jyly 3,4 mıllıon teńgege 11 nysanda pandýstar jasaý josparlanyp otyr. О́ńirde ınklıýzıvti bilim berýdi damytýǵa baılanysty úılestirý keńesi qurylyp, jumys isteıdi. Keńes tóraǵasy Marat Ybyraevtyń aıtýynsha, ınklıýzıvti mádenıetti qalyptastyrýǵa qoǵam bolyp atsalysý qajet.
–Inklıýzıvti mádenıetti qalyptastyrýdyń búginde mańyzy zor. Qoǵam tarapynan túsinistikpen qaraýdy qalyptastyrýymyz qajet. Bul árıne, balalar arasyndaǵy qatynastan bastaý alady, odan keıin baryp, eki jaqty ata-analar, muǵalimder men ata-analar tarapynan týyndaıtyn máseleler de barshylyq. Jalpy, bilim berý júıesinen bólek, mádenıet, sport bólimderi de barynsha kedergisiz orta qalyptastyrý qajet. Búgingi tańdaǵy ózekti ári ótkir máseleniń biri qajetti ınfraqurylymnyń joqtyǵy. Dámhana men shashtarazdar, kınoteatrlar men oıyn alańdary da joqtyń qasy. Mine, osy baǵytta jumys jasalýy tıis, deıdi oblystyq ınklıýzıvti bilim berýdi damytý jónindegi úılestirý keńesiniń tóraǵasy Marat Ybyraev.
Sońǵy ýaqytta aýtızm belgisi bar balalardyń sany kóbeıip keledi. Ondaı balalarǵa birinshi kezekte dári emes, pedagog, psıholog, logopedtiń kómegi kerek, deıdi 2 jasynda balasynan aýtızmniń belgilerin baıqaǵan ana Álııa Rahymbekova. Balasyn áleýmettik ortaǵa beıimdeý maqsatynda búginde Álııa «Erekshe ómir» qoǵamdyq qoryn quryp otyr.
Oblysta aýtızm dıagnozy qoıylǵan balalarmen tikeleı jumys isteıtin ortalyq joq. Dese de, bilim berý mekemelerinde arnaıy ınklıýzııa kabınetteri ashylýda. Ázirge ondaı kabınet óńirde ekeý. Ol Kókshetaý qalasyndaǵy №4 orta mektep pen Býrabaı aýdany ortalyǵyndaǵy №4 orta mektebinde ornalasqan.
