Saılaýǵa jalpy úsh kandıdat túsken edi. Gaosıýn qalasynyń ákimi, Qytaımen qosylýdy jaqtaıtyn Gomından partııasynyń ókili Han Goıýı 38,5 paıyz daýys jınady. Al Birinshi ulttyq partııa atynan túsken Djeıms Sýn nebári 4 paıyzǵa ıe boldy. S.Invenniń basty qarsylasy sanalǵan H.Goıýı óziniń jeńilgenin moıyndady. Endi, eski de jańa prezıdentti ulyqtaý rásimi 20 mamyrda ótpek.
Aıta ketý kerek, S.Invendi 8 mıllıonnan astam adam qoldaǵan eken. Taıvan 1996 jyly tikeleı daýys berýdi engizgeli beri buryn-sońdy eshkim mundaı qoldaýǵa ıe bolǵan emes. Osydan-aq halyqtyń Qytaıdan at quıryǵyn short kesisýdi qalaıtyny ańǵarylady.
«Bul saılaý qanshalyqty erkindik pen demokratııany tańdaıtynymyzdy kórsetti. Elimizdiń tynyshtyǵyn saqtap, azattyǵymyzdy qorǵaý maqsatynda kúsh-jigerimizdi salýymyz kerek», dedi S.Inven daýys berý nátıjesi jarııalanǵannan keıin.
Saı hanymnyń jeńisi myna nárseni anyq baıqatady. Keıingi birneshe jylda Taıvanda Qytaıdyń astyrtyn áreketine qatysty halyqtyń qarsylyǵy kúsheıe túsken. 2018 jyly aldyn ala daýys berý ótip, Demokratııalyq damý partııasyn qoldaıtyndar azaıyp ketken-di. Alaıda, el ekonomıkasynyń turaqtanýy, Gonkongtaǵy jappaı sherýler turǵyndardyń pikirin túbegeıli ózgertken syńaıly.
S.Inven prezıdenttiginiń birinshi tórt jylynda Qytaı Taıvandy ábden qyspaqqa aldy. Áýeli ushaqtasyǵysh kemelerin Taıvan buǵazynan arly-berli ótkizip, qyr kórsetti. Sondaı-aq qytaılyq týrısterdiń Taıvanǵa barýyna tyıym saldy.
Jalpy, Qytaıdyń qol astynda bolyp, olar belgilep bergen partııasy el basqarǵan soń, taıvandyqtar azattyqty bir adamdaı-aq ańsady. Sondyqtan shyǵar, óz qoly óz aýzyna jete sala damýdyń demokratııalyq jolyn tańdap, Azııadaǵy qýatty memleketke aınalyp shyǵa keldi.
Qytaı bıligi áli kúnge deıin Taıvandy óz aımaǵy sanaıdy. Sol sebepti «bir el – eki júıe» bastamasyn qoldaýdy kózdeıdi. Biraq taıvandyqtar mundaı jobaǵa múldem qarsy.
Byltyr qańtarda Sı Szınpın halyqqa joldaýynda kúnderdiń kúninde Taıvannyń Qytaıǵa qosylatynyn aıtqan. Oǵan qosa, qajet jaǵdaıda qarý qoldanýǵa da quqyly ekenin málimdedi. Qytaı basshysynyń mundaı sózi Taıvan turǵyndarynyń ashý-yzasyn keltirip, birqatar qalada sherý ótken-tuǵyn.
Birinshiden, elde tutas bir býyn azattyq aıasynda ósip shyqty. Olar úshin demokratııanyń mańyzy zor. Ekinshiden, Qytaı men Sı Szınpınniń túpkilikti jospary jas memleketterge ońtaıly emes. «Alyp aıdaharmen» kórshiles jatqanda qamsyz otyrýǵa bolmaıtynyn Taıvan turǵyndary jaqsy túsinedi.
Endeshe, halyqtyń tańdaýy S.Invenge túskeni bir nárseni anyq ańǵartady. Taıvan sekildi táýelsizdiktiń dámin endi-endi sezingen elderdiń turǵyndary alpaýyt memlekettiń yqpalyna túsýdi emes, túbegeıli azattyqty kózdeıdi.
