Foto moa.gov.kz
Jergilikti atqarýshy organdar tarapynan kelip túsken suranystarǵa sáıkes 2019 jyly iri qara maldardy syrǵalandyrý úshin – 2, 8 mln dana, usaq múıizdi maldarǵa – 6,8 mln dana, shoshqaǵa – 223, 5 myń dana, túıe malyna – 44, 8 myń dana qulaq syrǵalary berildi.
Jalpy respýblıka boıynsha 2019 jyldyń 31 jeltoqsandaǵy málimetterge sáıkes aýyl sharýashylyǵy janýarlaryn sáıkestendirý derekter qorynda 7 696 606 bas iri qara, 19 871 460 bas usaq mal, 716 070 bas shoshqa, 2 708 609 bas jylqy, 214 434 bas túıe tirkelgen. Buǵan deıin habarlaǵanymyzdaı, búgingi kúni Qazaqstanda 31 mln astam aýyl sharýashylyǵy janýarlary bar.
Aıta keteıik, Qazaqstan Respýblıkasynyń «Veterınarııa týraly» Zańyna sáıkes - Aýyl sharýashylyǵy janýarlary mindetti túrde sáıkestendirilýi qajet. Janýarlardy sáıkestendirý aıasynda janýarlarǵa eseptik nómir jáne veterınarııalyq tólqujat beriledi. Sondaı-aq jaıylatyn jeri, tuqymy, jasy, túsi, maldyń ıesi týraly málimetter esepke alýdyń arnaıy derekqoryna engiziledi.
«Aýyl sharýashylyǵy janýarlaryn sáıkestendirý» aqparattyq júıesi aýyl sharýashylyǵy janýarlaryn esepke qoıý jáne esepten shyǵarý, aldyn alý sharalardy tirkeý, kepildikti tirkeý jáne t.b. qyzmetterdi atqarady. Aqparattyq júıe naqty ýaqyt rejıminde jumys isteıdi jáne engizilgen barlyq ózgerister men tolyqtyrýlar derekter saqtalǵannan keıin birden kórsetiledi.
Kez kelgen azamat atalǵan júıeden janýarlardyń esepke qoıylǵany nemese shyǵarylǵany týraly, júrgizilgen veterınarııalyq-profılaktıkalyq is-sharalar (vaksınasııa, dıagnostıka) jáne t. b. aqparattardy suraý joldaý arqyly ala alady.
