Saıramda jurtty san soqtyrǵan bir jaǵdaı bolyp tur. Osydan bes jyl buryn aýdan ortalyǵy – Aqsýkent aýylynyń ákimi jurtqa jerdi ońdy-soldy úlestiripti. Alaıda, sol myrzalyqtyń zardabyn jergilikti halyq búgin tartyp otyr. Úı salýǵa berilgen bul jerler áldebir sharýa qojalyǵynyń ıeliginde eken. Endi aýdan ákimdigi «sol kezde shyǵarylǵan aýyl ákiminiń sheshimi zańsyz, sondyqtan 4200 jer telimin keri qaıtaramyz», deıdi. Al kezinde jer úlestirgen basshylar áldeqashan jumystaryn aýystyryp jibergenin, árıne, ishterińiz sezip otyr. Eń ókinishtisi, álgi jerge kóp otbasylar úı, qora-jaı salyp alǵan.
Saıramda jurtty san soqtyrǵan bir jaǵdaı bolyp tur. Osydan bes jyl buryn aýdan ortalyǵy – Aqsýkent aýylynyń ákimi jurtqa jerdi ońdy-soldy úlestiripti. Alaıda, sol myrzalyqtyń zardabyn jergilikti halyq búgin tartyp otyr. Úı salýǵa berilgen bul jerler áldebir sharýa qojalyǵynyń ıeliginde eken. Endi aýdan ákimdigi «sol kezde shyǵarylǵan aýyl ákiminiń sheshimi zańsyz, sondyqtan 4200 jer telimin keri qaıtaramyz», deıdi. Al kezinde jer úlestirgen basshylar áldeqashan jumystaryn aýystyryp jibergenin, árıne, ishterińiz sezip otyr. Eń ókinishtisi, álgi jerge kóp otbasylar úı, qora-jaı salyp alǵan.
Bul másele úlken daýǵa aınalyp, tipti, jer alǵandar «sharasyzdyq tanytyp otyrǵan qazirgi aýdan basshylary qyzmetinen ketsin» dep tepsingen bolatyn. Artynsha arnaıy komıssııa quryldy. Keshe komıssııa tóraǵasy, oblys ákiminiń orynbasary Erbol Sadyr tekserý qorytyndysyn jarııa etti. Sóıtsek, sansyz baptar eli bylyqqa batyp-aq qalypty. Aqsýkent aýyl okrýgi ákimi 2008-2009 jyldar aralyǵynda turǵyn úı salý úshin Áıteke bı ýchaskesinen, Qarabulaq tas joly jáne Almaty-Termez avtojoly boıynan 5328 azamatqa sheshim shyǵaryp bergen. Endi myna masqarany qarańyz. 5328 sheshimniń ishinde 1114 azamat 2 sheshimmen 2 retten jer alǵan. Dál osylaısha 176 azamat 3 ret, 17 azamat 4 ret, 3 azamat 5 ret jer alypty. 667 azamattyń atynda buryn jer ýchaskeleri tirkelgen bolsa da ákimniń jer alý týraly sheshimine ıe bolǵan. Jer úlestirýshi saıramdyq ákimderdiń qunyǵyp ketkeni sonshalyq «ár azamat bir márte ǵana jer ýchaskesin alýǵa quqyly» degen zań baptaryna pysqyryp ta qaramaǵan ǵoı. Ol ol ma, kóshi-qon polısııasynan alǵan málimetterge qaraǵanda, jer alǵan 190 azamat Saıram aýdanynan tys jerde turatyny, 1832 azamattyń jeke basyn anyqtaıtyn qujattary, tipti, jer alýǵa jazǵan ótinishteriniń de bolmaǵany anyqtalypty. Sonda Aqsýkent aýylynyń ákimi jer úlestirgen be, álde teri úlestirgen be?!
«Bir otbasy múshelerinde 7-8-ge deıin aýyl ákiminiń sheshimderi bar. Buryn-sońdy jer almaǵandardyń máselesi 10 kúnniń ishinde sheshiledi. Ondaı azamattardyń sany – 1110. Zań talaptaryna sáıkes birinshi kezekte muqtaj azamattarǵa jer ýchaskeleri beriletin bolady. Al, birneshe márte jer alǵandarǵa eshteńe berilmeıdi. Búgingi kúnde 55,755 gektar jer ýchaskesinde ornalasqan sharýa qojalyqtarynyń jerleri qaıtarylyp, turǵyn úı qurylysyn júrgizýge daıyndaldy», deıdi Saıram aýdanynyń ákimi Ýálıhan Qaınazarov. Bul is boıynsha barlyq qujattar prokýratýraǵa ótkizilipti. Kimder úlestirdi, kimder kináli, mine, munymen osy prokýratýra aınalyspaq. Bir qyzyǵy, buǵan deıin aýdandyq prokýratýradaǵylar «sheshim zańsyz shyǵarylǵan, biraq is qozǵaýǵa qylmystyq negiz joq» degen tujyrym jasap, jer úlestirgen sheneýnikter tek eskertýmen ǵana shektelgen eken. Al, endi qaıter eken?
Oralhan DÁÝIT,
«Egemen Qazaqstan».
Ońtústik Qazaqstan oblysy.
