Znamenka aýylyndaǵy «Organıko» jaýapkershiligi shekteýli seriktestigi bıylǵy qysta ekinshi ret dán egip jatyr. Aldyńǵy sepkenderiniń ónimi kóz qýantyp samsap tur. Seriktestik Esil aýdanynyń ǵana emes, Kókshetaý men Qostanaıdaǵy saýda núktelerine táp-táýir básekelestik týǵyzýda.
– О́tken jyly aýdan ortalyǵyndaǵy saýda sórelerin ekologııalyq taza ónimimizben jaýlap aldyq, – deıdi jylyjaı sharýashylyǵynyń jetekshisi Vıtalıı Korenkov, – keıin alystaǵy tutynýshylar da qulaqtanyp, ózderi izdep kele bastady. Máselen, Qostanaı qalasynyń tutynýshylary aptasyna bir jarym tonnaǵa deıin alady. Dál osyndaı kólemde aýdan ortalyǵynda satylady. Kókshetaýlyqtarǵa 650-700 kılo tóńireginde ótip tur.
Jylyjaı sharýashylyq jetekshisiniń aıtýyna qaraǵanda, eń bastysy sapa eken. О́nimiń sapaly bolsa, básekelestikte básiń joǵary bolmaq. Sodan soń baǵany da eskermeı bolmaıdy. Seriktestik bir maýsymda 30 tonnaǵa jýyq ónim óndirgen. Endi birer kúnnen keıin jańa ónimdi jınaý bastalady. Sol kezde kiris te kóbeıip qalmaq.
Jylyjaı – jergilikti «Tineı-Agro» jaýapkershiligi shekteýli seriktestiginiń quramdas bóligi. Investorlar tarapynan ekonomıkalyq tıimdiligi bar ekenine áldeqashan kóz jetken. Olaı bolmaǵanda she? Jergilikti jerde organıkalyq tyńaıtqysh ıen tegin, sý da ózderiniki. Jylýǵa da onshalyqty qınalyp otyrǵan joq. Kómirden isti bastaǵanda-aq bas tartqan. Arnaıy jabdyqtalǵan peshte seriktestiktiń egin alqaptarynan destelenip jınalǵan sabandy jaǵady. Osynyń barlyǵy ózindik qunynyń arzandaýyna táp-táýir áser etedi. Ony aıtasyz, qalǵan kúl de tyńaıtqysh retinde kádege jarap jatyr. Jańalyqqa jany qumar jandar eńbek dese janyp turady. Máselen, jylyjaıdyń alǵashqy korpýsy salynyp bitisimen onda qııardyń qulaǵy qyltııa bastady.
Jergilikti jerde qasqaldaqtyń qanyndaı bolyp esepteletin kókónis ósirý qolǵa alynǵaly ondaǵan adam jumyspen qamtylyp, ýaqtyly jalaqy alyp otyr. Qaı jaǵynan alyp qarasańyz da tıimdi ekeni kózge uryp tur. Kórshisiniń qareketin kórip bizdiń aǵaıyn da bel býsa deısiń osyndaıda.
Aqmola oblysy
