Kórmege eki myń jyldan astam tarıhy bar Taraz qalasynda júrgizilgen arheologııalyq qazba jumystary kezinde tabylǵan qundy jádigerler men kóne shahar tarıhyna baılanysty stendter jáne túrli jádigerler qoıyldy. Onyń ishinde ártúrli kezeńdegi mys monetalary, ıaǵnı túrgesh, qarahan tıyndary, sonymen qatar qola buıymdaryna jatatyn shyraǵdandar, jumyrtastar, qumyralar, taǵara, jınaq sandyqshalary jáne sý qubyrlary sııaqty jádigerler de bar. «Kórme muǵalimder men oqýshylardyń kóńilinen shyqty. Munda kelýshiler ejelgi Tarazda qolónerdiń qandaı túrleriniń damyǵandyǵyn kórip, túrli jádigerlermen tanysty. Sonymen qatar, ata-babalarymyz qaldyrǵan tarıhı-mádenı murany qyzyǵýshylyqpen tamashalady. Al, kórkem úıirmelerge qatysyp, tarıhtanýmen shuǵyldanyp júrgen balalarǵa atalǵan kórme úlken shabyt beredi degen oıdamyz», deıdi «Ejelgi Taraz eskertkishteri» tarıhı-mádenı qoryq-mýzeıiniń dırektory Nurlan Byqybaev.
Jalpy, bul kórme jetkinshekterdiń úlken qyzyǵýshylyǵyn týdyrǵan joba boldy deýge bolady. Kórme kezinde jas dombyrashylar kúı qoıylymyn qoıyp el yqylasyna bólense, tarıhı jádigerlerdi aınytpaı qaǵaz betine túsirgen jas sýretshiler kópshiliktiń kózaıymyna aınaldy. Eki kún boıy uıymdastyrylǵan kórmeni 1300-ge jýyq oqýshy tamashalady. Sonymen qatar, ulttyq qundylyqtardy jas urpaqqa nasıhattaý maqsatynda jáne balǵyndardy jádigerlermen jete tanystyrý úshin oqýshylarǵa arnaıy suraqtar da qoıyldy. Jyl basynda bastaý alǵan «Uly dala jaýharlary» atty jyljymaly kórme Áýlıeata jerinde jyl sońyna deıin jalǵasady.
Jambyl oblysy
