Jıynda sóz alǵan Qazaqstannyń Tuńǵysh Prezıdenti N.Nazarbaev azamattardyń turǵyn úı quqyqtaryn iske asyrý máselesi memlekettiń áleýmettik saıasatynyń basym baǵyty ekendigine toqtaldy. Sondaı-aq Elbasy memlekettik áleýmettik saıasat turǵysynan zańnamalyq bazany jetildirý erekshe mańyzǵa ıe ekenin atap kórsetti.
Sonymen qatar turǵyn úı quqyǵyn iske asyrý máselesi halyqtyń ál-aýqatyna tikeleı baılanysty ekendigin aıtty.
«Meniń tapsyrmam boıynsha birneshe memlekettik baǵdarlama iske asyryldy. Buryn baspana satyp alýǵa múmkindigi bolmaǵan qazaqstandyqtar úshin turǵyn úıdiń qoljetimdiligi qamtamasyz etildi», dedi Nursultan Nazarbaev.
Elbasy Ata Zańdy qurmetteý jáne qatań saqtaý eldiń sátti damýynyń kepili ekendigin jáne Konstıtýsııanyń 25 jyldyq mereıtoıy qarsańynda bul máseleniń ózektiligi artyp otyrǵandyǵyn tilge tıek etti.
Konstıtýsııalyq Keńestiń Tóraǵasy Qaırat Mámı bul otyrys elimizdiń konstıtýsııalyq damýy tarıhynda aıtýly oqıǵa ekenin óıtkeni ol azamattardyń konstıtýsııalyq quqyqtaryn qamtamasyz etýmen tyǵyz baılanysty ekenin jetkizdi.
– Qazaqstan Respýblıkasy Konstıtýsııasy 71-babynyń 1-tarmaǵyna sáıkes Qazaqstannyń Tuńǵysh Prezıdenti – Elbasy Konstıtýsııalyq Keńestiń ǵumyr boıy múshesi, – dedi Q.Mámı.
Zańnyń atalǵan normasy jetilmegeni jáne azamattardyń konstıtýsııalyq quqyqtaryn júzege asyrýǵa kedergi keltirýi múmkin ekendigi qozǵaldy.
Is-shara barysynda Úkimet, Parlament Senaty jáne Májilisi, Joǵarǵy sot, Bas prokýratýra ókilderi men sarapshylardyń pikiri tyńdaldy.
О́z kezeginde Joǵarǵy sot tóraǵasy Jaqyp Asanov: «Biz Konstıtýsııalyq Keńeske ózimizdiń qorytyndymyzdy jiberdik. Qorytyndyda arnaıy taldaý qamtylǵan. Onda adam quqyǵyn jáne bostandyǵyn qorǵaýdyń negizgi qaǵıdattary, sondaı-aq memlekettiń konstıtýsııalyq kepildigi, sonyń ishinde azamattardy turǵyn úımen qamtý máselesi bar», deı kelip, Konstıtýsııalyq Keńesten osy másele-
ge muqııat qaraýdy surady.
Otyrysta Májilis Tóraǵasynyń orynbasary Gúlmıra Isımbaeva Elbasy bastamasymen qolǵa alynǵan «7-20-25», «Baqytty otbasy», «Tur-ǵynúıqurylysjınaqbankiniń» baǵdarlamalary, sondaı-aq «Nurly jer» baǵdarlamasy aıasynda jumys istep júrgen jastardy turǵyn úımen qamtamasyz etý isi boıynsha tıisti sharalar qabyldanyp jatqanyn aıta kelip, «Qazaqstan óziniń halyqaralyq mindettemelerin tolyq oryndap otyr deı alamyz. Azamattardy turǵyn úımen qamtamasyz etý, jaǵdaı jasaý konstıtýsııalyq norma zań júzinde iske asyrylyp keledi. Bul zańnyń qabyldanǵanyna 22 jyl bolǵanyn bárimiz bilemiz. Aldaǵy ýaqytta quqyq qoldaný tájirıbesinde ekiudaı túsinikti boldyrmaý jáne qatelikke jol bermeý úshin osy normaǵa tıisti túzetýler engizý múmkin ekenin de joqqa shyǵarmaımyz», dedi.
Jıynǵa qatysýshylardyń pikirleri men jaýaptarynan keıin Konstıtýsııalyq Keńes normatıvtik qaýly qabyldady. Atalǵan qaýly basylymdarda jarııalanady.
