Ýhan qalasynan bastalǵan vırýstan japa shekkenderdiń sany 440-qa jetken. Sońǵy málimetterge sensek, dert belgileri Qytaıdyń birneshe provınsııasynda, AQSh, Taıland jáne Ońtústik Koreıada baıqalǵan.
Osyǵan deıin vırýstyń adamnan adamǵa juǵatyny aıtylǵan edi. Degenmen, Qytaı áli de belgisiz vırýstyń qaıdan paıda bolǵanyn anyqtaı almaı otyr.
Eldiń Ulttyq densaýlyq saqtaý komıssııasynyń vıse-mınıstri Lı Bınniń aıtýynsha, vırýstyń mýtasııaǵa ushyrap, indettiń odan ári taralý qaýpi bar. Qytaı jańa jylynyń qarsańynda bir aptalyq demalysta mıllıondaǵan adamnyń el ishinde, myńdaǵan turǵynnyń shetelge saıahattaýy jaǵdaıdy órshitpek.
Qazaqstannyń shekaralyq jáne kedendik qyzmeti kórshiles eldegi belgisiz vırýsqa qatysty baqylaýdy kúsheıtkeni aıtylǵan edi. Áýejaıdyń sanıtarlyq-karantındik baqylaý qyzmeti Qytaıdan kelgen jolaýshylardyń dene qyzýyn arnaıy teplovızor qurylǵysy arqyly tekserýdi qolǵa alǵan. Dene qyzýy joǵary jolaýshy birden medısınalyq tekserýden ótedi.
Jyl basynan beri Qytaıdan Qazaqstanǵa 10 myńǵa jýyq jolaýshy kelgen.
