«Osy ýaqyt ishinde adamdar ózderiniń saqtandyrý mártebesin anyqtap, mindetti áleýmettik medısınalyq saqtandyrý júıesiniń qatysýshysy bolýy kerek.
Saqtandyrý paketine barlyq josparlanǵan medısınalyq qyzmetter kiredi: ońaltý jáne qalpyna keltirý emi, mamandardyń konsýltatıvtik-dıagnostıkalyq kómegi, stasıonarlyq kómek, ambýlatorlyq dári-dármekter jáne basqa medısınalyq qyzmetter. Kepildendirilgen tegin paketke barlyq jedel medısınalyq, pallıatıvti, alǵashqy medısınalyq jáne jedel járdem kómegi kiredi. Sonymen birge sozylmaly jáne qoǵam úshin qaýipti aýrýlary bar pasıentter mindetti áleýmettik medısınalyq saqtandyrý júıesine qatysýǵa qaramastan, saqtandyrý paketine tolyq qol jetkize alady.
Jarnalardy tóleýden azamattardyń 15 jeńildetilgen sanaty bosatylady: balalar, zeınetkerler, Uly Otan soǵysynyń ardagerleri, múgedekter, kóp balaly analar jáne taǵy basqalar. Olar úshin medısınalyq saqtandyrý qoryna jarnalardy memleket tóleıdi. Mamandar Semeıdegi jedel medısınalyq járdem aýrýhanasynda ótken jıynda Shyǵys Qazaqstan oblysynda mindetti áleýmettik medısınalyq saqtandyrý júıesin engizý boıynsha ázirlik týraly aıtyp berdi. «Áleýmettik medısınalyq saqtandyrý» qorynyń Shyǵys Qazaqstan oblysy boıynsha fılıalynyń dırektory Ǵalymjan Ábilov aımaqta mindetti áleýmettik medısınalyq saqtandyrýdy engizý úshin normatıvtik-quqyqtyq baza bekitilgenin málimdedi.
- Elimizdegi mindetti medısınalyq saqtandyrý júıesinde halyqty medısınalyq kómekpen qamtý shamamen 87% quraıdy, Shyǵys Qazaqstan oblysynda bul kórsetkish 86,5% quraıdy. Oblys halqynyń 13,5% shartty túrde saqtandyrylmaǵan, bul shamamen 184 myń adam. 2018 jyldyń 1 qańtardan bastap mártebesin jańartýdy qajet etetin 186 myń oblystyń turǵyndarynan turatyn tizim anyqtaldy. Búgingi tańda bul kórsetkish 34,4 myń adamdy quraıdy. Jumys jalǵasyp jatyr. 86,5% shartty túrde saqtandyrylǵan dep sanalady. Memleket járdemdesetin azamattardyń 15 áleýmettik sanatyna 722 myń adam kiredi. Turaqty emes tólemderge keler bolsaq, ótken jyly Qor 43 myń salyq tóleýshiden 7,3 mlrd teńgeden asatyn aýdarymdar aldy, - dedi Ǵalymjan Ábilov.
Sonymen qatar, otyrysta atap ótilgendeı, Shyǵys Qazaqstan oblysynda mindetti áleýmettik medısınalyq saqtandyrý 100% tıimdilikpen ótti. Barlyq medısınalyq mekemeler ınternetpen qamtylyp, aqparattyq júıeleri Densaýlyq saqtaý mınıstrligi men «Santandyrý» qorynyń aqparattyq júıelerimen biriktirilgen. Tegin medısınalyq kómektiń kepildik berilgen kólemin jáne mindetti áleýmettik medısınalyq saqtandyrý paketin satyp alý jospary ótken jylǵa qaraǵanda orta eseppen 28%-ǵa artty. Qarjylandyrý ósimi ońaltý emi, dıagnostıka jáne basqa medısınalyq qyzmetter túrleri boıynsha baıqalyp jatyr.
Esterińizge sala keteıik, MÁMS saqtandyrylǵan azamattarǵa tegin medısınalyq kómektiń kepildik berilgen kóleminen asatyn medısınalyq qyzmetterdiń keńeıtilgen paketin usynady. Mindetti áleýmettik medısınalyq saqtandyrý úshin azamattardyń árqaısysy belgilengen mólsherde medısınalyq saqtandyrý qoryna aı saıyn jarnalar men aýdarymdar tóleýge mindetti» delingen habarlamada.
