Qoǵam • 22 Qańtar, 2020

Balalyq shaqtyń kórmesi

16 ret kórsetildi

Sýretshi-grafık, kórkemdeýshi Kúlásh Tórebaevanyń esimi búginde alys-jaqyn shetelderge málim. Q.Sátbaev atyndaǵy Qazaq ulttyq tehnıkalyq ýnıversıtetiniń «Sáýlet jáne dızaın» kafedrasynda stýdentterge tálim berip júrgen shyǵarmashyl tulǵa sýret salýǵa bala kezinen yntyq bolǵanyn aıtady.

Abaı atyndaǵy Qazaq pedagogıkalyq ınstıtýtynyń kórkem-grafıkalyq óner fakýltetin, S.G.Stroganov atyndaǵy Máskeý memlekettik kórkem-ónerkásip akademııasyn bitirgen kásibı maman beıneleý óneriniń V.I. Antoshenko-Olenev syndy sheberlerinen tálim alǵan.

Jaqynda Memlekettik Ortalyq mýzeıde ótken «Balalyq shaqtyń sátteri» taqyrybyna arnalǵan kórmede Kúlásh Tórebaevanyń ártúrli janrdaǵy «Ájem  aıtty», «Úlken áje», «Naýryz. Qonaqta», t.b. sýretter toptasy qoıyldy. Kúlásh Tórebaevanyń shyǵarmashylyǵynda etnografııalyq taqyryptardyń orny bólek. Sýretshiniń jumystary «Qazaqstan Respýblıkasynyń Táýelsizdiginiń 20 jyldyǵyna arnalǵan konkýrstyq shyǵarmalar» jáne «Mereıtoı palıtrasy» jınaǵyna engen. K.Tórebaeva shyǵarmashylyǵynyń taǵy bir qyry qabyrǵalardy sýretteý, vıtrajdar jasaý, ulttyq kádesyılardy ázirleýmen aıshyqtalady. Sýretshiniń sondaı-aq zamanaýı baǵyttaǵy sheberlik-sabaqtary úlken suranysqa ıe.

1

Kórmeniń taǵy bir ereksheligi munda Kúlásh Tórebaevanyń qyzy Jannanyń týyndylary óner zalynan oryn aldy. Balalyq shaǵynan shyǵarmashylyq ortada ósken jas daryn ıesiniń aınalaǵa degen názik ári kórkem talǵamy anasynan daryǵan. T.Júrgenov atyndaǵy «Grafıkalyq dızaın» fakýltetinde bilim alǵan Janna ónerge yntaly jandardy «Arapovanyń dızaın-stýdııasynda» sýret áleminiń erekshelikterin meńgerýge baýlysa, qazirgi kezde shyǵarmashylyǵyn Túrkııada jalǵastyrýda. Keskindeme, grafıka, vıtraj jáne qabyrǵa sýretterin salýmen aınalysatyn sýretshi qalalyq, respýblıkalyq jáne halyqaralyq kórmelerdiń turaqty qatysýshysy.

Búginde eńbekteri elimizben qatar Reseı, Túrkııa, Izraıl jáne AQSh-tyń jeke kolleksııalarynda ornalasqan sýretshilerdiń shyǵarmashylyǵyna arnalǵan kórmeni kásibı mamandar joǵary baǵalasa, boıaýlar álemindegi ádemi kórinisti  qala turǵyndary asqan súıispenshilikpen qabyldady.

Sońǵy jańalyqtar

Uqsas jańalyqtar