«Memleket basshysy Qasym-Jomart Kemeluly Toqaevtyń 2020 jylǵy 24 qańtardaǵy Úkimettiń keńeıtilgen otyrysynda bergen tapsyrmalaryna sáıkes biz Úkimettiń, Ulttyq Banktiń jáne Qarjy naryǵyn retteý jáne damytý agenttiginiń tıisti is-sharalar josparyn kelistik», — dedi E. Dosaev. 

Ulttyq Bankke bekitilgen is-sharalar sheńberinde birqatar baǵyt boıynsha jumysty júrgizý kózdelgen. Onyń ishinde-aqsha-nesıe saıasatynyń tıimdiligin arttyrý, qarjy júıesiniń turaqtylyǵy men jalpy ekonomıkalyq damý qajettiligi arasyndaǵy teńgerimdi qamtamasyz etý, valıýta naryǵyn damytý jáne t. b. boıynsha.

Aqsha-nesıe saıasaty

Aqsha-nesıe saıasatynyń tıimdiligin arttyrý, ınflıasııalyq kútýlerdi turaqtandyrý jáne ekonomıkany uzaq merzimdi qorlandyrýdy qamtamasyz etý úshin biz aǵymdaǵy jylǵy naýryzdyń sońyna deıin Aqsha-nesıe saıasatynyń 2030 jylǵa deıingi strategııasynyń jobasyn ázirleımiz. Saraptamalyq qaýymdastyqpen talqylanǵannan jáne múddeli memlekettik organdarmen kelisilgennen keıin joba aǵymdaǵy jyldyń 1 shildesine deıin Ulttyq Bank Basqarmasyna usynylady.

Qarjy turaqtylyǵy men ekonomıkalyq ósý arasyndaǵy teńgerim

Makroekonomıkalyq saıasat sharalaryn úılestirý maqsatynda aǵymdaǵy jylǵy naýryzda Úkimet, Ulttyq Bank pen Qarjy naryǵyn retteý jáne damytý agenttigi arasynda kelisim jasalady. 

Qujatta 2019 jyly bastalǵan makroekonomıkalyq saıasatty úılestirý jumysy jalǵastyrylady jáne qarjy júıesiniń turaqtylyǵy men jalpy ekonomıkalyq damý qajettiligi arasyndaǵy balansty qamtamasyz etý tásilderi ázirlenedi. 

Kelisimde mynalar:

• azyq-túlik naryqtaryndaǵy básekelestikti arttyrý jáne retteletin qyzmetterge tarıfterdi tıimdi baqylaý sharalary;
• Memlekettik baǵaly qaǵazdar naryǵyn damytý jáne 2-5 jyldyq oblıgasııalardy basym túrde shyǵarý máseleleri;
• eksportty odan ári ártaraptandyrý jáne ımport aýystyrý boıynsha jumsalatyn kúsh;
• bankrottyq rásimderin, atap aıtqanda «bir teńge – bir daýys» rásimin jetildirý jumysyn jalǵastyrý, sondaı-aq onyń tıimdiligin arttyrý úshin bankrottyq rásimin júrgizý merzimderin shekteý qamtylýy tıis.  

Valıýta naryǵyn damytý 

Qarjy naryǵyn teńgerimdi damytýdy qamtamasyz etý jáne Qazaqstanǵa sheteldik kapıtaldy tartý jumysy sheńberinde Ulttyq bank Qarjy naryǵyn retteý jáne damytý agenttigimen birlesip 2020 jylǵy 1 shildege deıin valıýtalyq táýekelderdi hedjırleýdiń naryqtyq ınfraqurylymyn damytý boıynsha usynystar engizedi.

Bul, bir jaǵynan, qarjy uıymdarynyń balansyndaǵy valıýta qarajatyn ekonomıkany ulttyq valıýtada kredıtteýge jumsaýǵa múmkindik beredi. Ekinshi jaǵynan, sheteldik ınvestorlardy valıýtalyq táýekelderden qorǵaý quralyna aınalady, sonyń nátıjesinde negizgi kapıtalǵa ınvestısııalar kólemin JIО́-niń 30%-na deıin jetkizýge yqpal etetin bolady. 

Tólem júıesin damytý

«Kóleńkeli ekonomıkamen kúres jáne qolma-qol aqshasyz esep aıyrysýlardyń úlesin arttyrý máseleleri Ulttyq banktiń negizgi basym mindetteriniń biri», — dedi E. Dosaev.

Ulttyq bank alǵa qoıǵan maqsattarǵa jetý úshin Qarjy naryǵyn retteý jáne damytý agenttigimen jáne Úkimetpen birlesip 2020 jylǵy 1 qazanǵa deıin Ulttyq tólem júıesin damytý baǵdarlamasyn ázirleıdi. Ulttyq tólem júıesi barlyq múddeli taraptar úshin ózara tıimdi negizde qurylatyn bolady.  

Qarjylyq tehnologııalar men ınnovasııalar

«Qarjy tehnologııalaryn odan ári damytý máselesi olardy qarjy naryǵyna engizý turǵysynan ǵana mańyzdy emes, búkil qarjy sektoryn keshendi damytýdyń negizgi faktory bolyp tabylady», — dep E. Dosaev, Ulttyq bank Qarjy naryǵyn retteý jáne damytý agenttigimen birlesip 2020 jylǵy 1 shildege deıin Qarjy tehnologııalary men ınnovasııalardy damytýdyń 2020-2025 jyldarǵa arnalǵan tujyrymdamasynyń jobasyn ázirleıtinin aıtty. 

Investısııalar statıstıkasy

Memleket basshysy atap ótkendeı, tikeleı ınvestısııalardy tartý — eldi damytýdyń negizgi quraly. 

Barynsha aıqyn málimetti alý úshin Ulttyq bank 2020 jylǵy sáýirden bastap munaı-gaz salasyn esepke almastan tikeleı sheteldik ınvestısııalardyń ákeliný statıstıkasyn toqsan saıyn jarııalaıtyn bolady.

Qarjylyq turaqtylyq jáne qarjy sektoryn odan ári reformalaýdyń barlyq sharalaryn úılestirý Memleket basshysynyń Jarlyǵyna sáıkes qurylǵan Qarjylyq turaqtylyq jónindegi keńes arqyly qamtamasyz etiledi.