Aqyn toıy týǵan topyraǵynda jalǵasty

Abaı • 29 Qańtar, 2020

Aqyn toıy týǵan topyraǵynda jalǵasty

76 ret kórsetildi

Bıylǵy jyldyń basty mereıtoılarynyń biri – Abaı Qunanbaıulynyń 175 jyldyǵy 21 qańtarda Elbasy Nursultan Nazarbaev pen Memleket basshysy Qasym-Jomart Toqaevtyń qatysýymen Arqa tórinde saltanatty túrde bastalǵan edi. Alashtyń astanasynan bastaý alǵan mereıtoılyq sharalar estafetasyn 22 qańtarda aqynnyń týǵan topyraǵy Shyǵys Qazaqstan oblysy birden ilip áketip, óńirdiń qalalary men aýdandarynda birqatar taǵylymdy sharalar uıymdastyryldy.

Azamat QASYM

Uly aqynnyń mereıli mereıtoıyna arnalǵan sharalar legi oblys ortalyǵy – О́skemen qalasynda da jalǵasty. Shahardaǵy zııaly qaýym ókilderi, aqsaqaldar, jastar, qalanyń qarapaıym turǵyndary Respýblıka alańyndaǵy hakim eskertkishine gúl shoqtaryn qoıyp, aqyn rýhyna taǵzym etti. Myńǵa jýyq adam jınalǵan saltanatty shara О́skemen qalalyq ishki saıasat, mádenıet jáne tilderdi damytý bóliminiń basshysy Qalqaman Sarınniń quttyqtaý sózimen ashyldy. «Arqa tórinen bastaý alǵan aqyn toıy búgin mine, Altaıda, Abaı elinde jalǵasyp jatyr. Oblys ákimi Danıal Kenjetaıuly atap ótkendeı, bıyl óńirimizde Abaı toıyna arnalǵan 500-den astam is-shara ótedi. О́skemen qalasy ákimdiginiń de óz josparlary bar. Qala kóleminde 100-ge jýyq irili-usaqty mádenı is-shara Abaı atamyzdyń 175 jyldyq mereıtoıyna arnalady. Sondyqtan biz uly aqynnyń jerlesteri retinde moınymyzdaǵy jaýapkershilikti jaqsy sezinýimiz kerek», dedi ol.

Budan keıin О́skemendegi S.Amanjolov atyndaǵy Shyǵys Qazaqstan memlekettik ýnıversıteti rektorynyń keńesshisi, professor Silámbek Orazalın sóz alyp, jurtshylyqty mereıtoımen quttyqtap, Abaıdyń «Esińde bar ma jas kúniń» óleńin mánerlep oqyp berdi. Sonymen qatar A.Pýshkın atyndaǵy oblystyq kitaphanada fılologııa ǵylymdarynyń kandıdaty Lıýsııa Abdýllınanyń «Zamanaýı oqýdaǵy Abaı» atty ınteraktıvti, avtorlyq dáris-áńgimesi men jýrnalıst, abaıtanýshy, sózjumbaq qurastyrýshy Qalıbek Altybaevtyń jetekshiligimen «Men bir jumbaq adammyn...» sózjumbaq saıysy ótkizilip, sharaǵa kelýshiler Abaı shyǵarmashylyǵy boıynsha latyn álipbıinde dıktant jazdy. Al Oralhan Bókeı atyndaǵy qalalyq kitaphanada abaıtanýshy ǵalymdar, zııaly qaýym ókilderi bas qosyp, áýeli 1954 jyly túsirilgen «Abaı» tuńǵysh derekti fılmin tamashalap, Prezıdent Qasym-Jomart Toqaevtyń «Abaı jáne XXI ǵasyrdaǵy Qazaqstan» maqalasyn jan-jaqty talqylap, oılaryn ortaǵa saldy.

Alashtyń rýhanı astanasy atanǵan Semeı qalasynda Abaı toıynyń bastalýyna oraı elimizge esimderi keńinen tanymal ónerpazdardyń qatysýymen úlken konsert ótti. Mádenı sharaǵa oblys ákiminiń orynbasary Álisher Marhabat qatysyp, álemdik deńgeıdegi oı alybynyń mereıtoıyn joǵary deńgeıde ótkizý aqynnyń jerlesteri úshin úlken jaýapkershilik júkteıtindigin atap ótti.

Konsertte Erlan Rysqalı, Gúlmıra Sarına, Ádil Turǵanbaev, Berik Omarov syndy dástúrli ánshilermen qatar «Astana Opera» teatrynyń Medet Shotabaev, Jupar Ǵabdýllına sekildi ónerpazdary oblys ákiminiń sımfonııalyq orkestri, Semeı qalasyndaǵy Á.Qashaýbaev atyndaǵy fılarmonııasynyń Bıbigúl atyndaǵy Qazaq ult aspaptar orkestriniń súıemeldeýimen Abaı ánderin áýelete shyrqady.

Shyǵys Qazaqstan oblysy