Úzdikter qatarynan kórinip júrgen jas jetkinshektiń jobasy faceID dep atalady. Oqýshy sheteldik jetekshisimen birlese otyryp 2 aıǵa jýyq ýaqyt shamasynda aıaqtaǵan baǵdarlama úlken eńbekti talap etkenin aıtady.
«Bul bizdiń jobamyz – faceID.html arqyly jasalyp, adamnyń túrin, jasyn, kóńil kúıin kórsete alady», deıdi hımııa-bıologııa baǵytyndaǵy Nazarbaev zııatkerlik mektebiniń 8-synyp oqýshysy Nurasyl Maratov.
Jyl saıyn 2 ret dástúrli túrde ótetin kórmede jas ónertapqyshtardyń adam qyzmetin jeńildetetin jobalary tanystyryldy. Nazarbaev zııatkerlik mektebiniń 7-12 synyp oqýshylary men oblystaǵy bilim ordalarynan kelgen jetkinshekter pikir almasqan sharada robottehnıka, aqparat, sıfrly aımaq, Steam, Qazaqstandaǵy jasyl aımaq, qurylys jáne arhıtektýra, shekteýsiz shyǵarmashylyq, tárbıe jumysy seksııalary boıynsha 140-tan astam ǵylymı-shyǵarmashylyq joba qoıyldy.
«Jármeńkede toǵyz baǵyt boıynsha 114 jobamyz kórsetildi. Oqýshylarymyz sabaq oqyp qana qoımaı, zertteý jumystarymen de aınalysady», deıdi hımııa-bıologııa baǵytyndaǵy Nazarbaev zııatkerlik mektebiniń dırektory Balqan Qasymov.
Sondaı-aq atalǵan kórmege jıylǵan ata-analar men zııatkerlik mektep túlegi atanýǵa nıetti oqýshylar mektepke qabyldaný jasy, merzimi, synaq kúrdeliligi men erejesi týrasyndaǵy suraqtarǵa jaýap ala alady.
«31 qańtarǵa deıin mektebimizde qujattardy qabyldaý jumystary júrgizilip jatyr. Mekteptiń jumys isteý rejimi, ondaǵy úıirmeler, jalpy zııatkerlik mektep týraly kez kelgen suraqqa ata-analar men oqýshylar osy aradan tolyq jaýabyn alady dep úmittenemiz», deıdi mektep dırektory.
Aıta keterligi, Kórme ortalyǵynda ótken bul sharada jas ǵalymdardyń osyndaı júzdegen eńbegi tanystyryldy.
ShYMKENT
