Ordabasy aýdanyndaǵy Toqsansaı eldi mekeninde 130 gektar tálim jerge ızraıldik sýǵarýsyz tehnologııa arqyly «Sitrullus Lanatus» qarbyz kósheti otyrǵyzylyp, 23 tonna ónim alyndy. Bul ónim túgeldeı AQSh-qa eksporttalǵan. Osyndaı jańashyldyqtardy úırenýge bolady.
Túrkistan oblysynyń ákimi О́mirzaq Shókeev Ordabasy aýdanynyń ákimi Álipbek О́serbaevtyń halyqqa esep berý kezdesýinde osylaı dedi. Oblys ákimi aıtqan jobanyń tıimdiligi is júzinde dálelin tapqandyqtan, bıyl Qajymuqan aýyl okrýginde 387 gektarǵa qarbyzdyń atalmysh surpyn egý josparlanyp otyr. Aýdannyń ótken jylǵy shyǵysy men kirisin jiktep, esep bergen aýdan ákimi aldaǵy ýaqytta ekonomıkaǵa serpin beretin mańyzdy josparlarmen de bólisti. Mysaly, 2020 jyly jalpy ınvestısııalyq quny 97 mlrd teńgeden astam, 600-ge jýyq adamdy jumyspen qamtıtyn plastmassa jáne munaı-hımııa ónimderin óndirýge baǵyttalǵan 4 jobany iske asyrý kózdelip otyr. Al aýdannyń ónim kólemi byltyr 79, 2 mlrd teńgeni quraǵan. Kiristiń basym bóligi ónerkásip pen aýylsharýashylyǵy salasyna tıesili. Á. О́serbaev aýdanda búginde tamaq ónerkásibi, farmasevtıka, metallýrgııa, mashına jasaý, qurylys salasy men ken óndirý ónerkásibi syndy kásiptermen aınalysatyn 35 kásiporyn jumys isteıtinin atap ótti. Kásiporyndar byltyr 19 mlrd 251 mln teńgeniń ónimin óndirgen. Aıta keterligi, óńdeý ónerkásibiniń úlesi basym. О́nerkásip salasyndaǵy ónimniń 89,9 paıyzy shıkizat emes, daıyn taýar retinde shyǵarylǵan.
«Aýyl sharýashylyǵy salasyna toqtalsaq, egis kólemi áldeqaıda artyp 65 374 gektarǵa jetkizilgen. Kóbinese sýdy az qajet etetin daqyldarǵa kóńil bólinip otyr. Sońǵy jyldary aýdan aýmaǵynda jylyjaı salýǵa nıet bildirýshilerdiń de qatary artqan. Byltyr jalpy kólemi 72 gektar bolatyn jylyjaılardan 8 580,3 tonna ónim jınaldy», - dedi aýdan ákimi Á.О́serbaev.
Eseptik jıyndy qorytyndylaǵan oblys ákimi О́.Shókeev basshynyń jumysyna baǵany halyq beretinin, árbir ákim bıznespen bir tilde sóılese bilýi kerektigin aıtty.
