Nur Otan partııasy Jas Otan jastar qanatynyń keshegi tóraǵasy Dáýlet Káribek búginde «Nur-Sultan qalasy jastar saıasaty máseleleri basqarmasy» MM basshysy kadrlyq rezervtegi alǵashqy qadamyn óńirlerden bastamaq bolǵanyn aıtty.
Jambyl oblysy Sarysý aýdanynyń týmasy matematıka synybynda oqysa da, tarıh pen ádebıetke qyzyǵyp ósken. Jastar saıasatyna kelýi de osymen baılanysty bolsa kerek. «Teledıdardan kórip ósken elordaǵa arman qýyp keldim. «Turan» ýnıversıtetinde saıasattaný mamandyǵyn támamdadym. Elordaǵa kelgeli respýblıkanyń túkpir-túkpirinen jınalǵan jastarmen aralasa bastadym. Elorda elimizdiń batysy men shyǵysynan, ońtústigi men soltústiginen kelgen jastardyń bas qosyp, dostasýyna jaǵdaı jasaıdy. Sóıtip, soltústiktiń qyzymen otbasyn qurdym. Memleket astanasy jalyndy jastardyń ózin kórsetýge, maqsatyna jetýge jol ashady. Prezıdenttiń kadrlyq rezervi de jastar úshin úlken múmkindikterdiń biri dep bilemin. О́ıtkeni baǵdarlamaǵa memlekettik qyzmette jumys istegenderden bólek, memlekettik qyzmetke qatysty ózindik kózqarasy qalyptasqan, ıdeıalary bar túrli mamandyq ıeleri qatysa alady. Baq synaýshylar qatarynda jeke kásipkerler, tipti tehnıkalyq mamandyq ıeleri de boldy. Al bul olarǵa ózderin memlekettik qyzmet salasynda synap kórýge, eski júıege jańa lep berýge jol ashady», deıdi jas maman.
Dáýlet qazirgi múmkindik pen ashyqtyqtyń zamanynda bireýdiń kómegine sený, qoldaý kútýdi namys kóretinin de jasyrmady: «Jobanyń barlyq kezeńderinen eshkimniń kómeginsiz ózim óttim. Meniń ata-anam 40 jyl muǵalim bolyp qyzmet etken, qazir zeınet demalysynda. Barlyǵy ashyq ári ádil boldy dep senimmen aıta alamyn. Onlaın tapsyrǵandyqtan bıýrokratııa deıtin tejeýishter de bolmady. Qazir bireýdiń kómegine júginýdi namys sanaımyn».
Nur Otan partııasynda da óńirlerdi damytý jumystarymen aınalysqandyqtan jobadaǵy suraqtar Dáýletke jeńil bolǵan. «Suraqtar, shyny kerek, men úshin qıyn bolǵan joq. Nátıjesin bilgennen keıin bizderge tańdaý múmkindigi berildi. Ártúrli qurylymdardan habarlasty. Men óńirlik baǵytyn tańdadym. Segiz balanyń jetinshisi bolǵannan ba maǵan áleýmettik saıasat, óńirdegi máseleler qashan da qyzyq. Nur-Sultan qalalyq ákimdigi usynysyn bildirgende qýana qabyl aldym. Memlekettik qyzmetti jastar saıasatynan bastaý da men úshin erekshe mártebe. Sondyqtan jastar saıasatynan bastaýdy jón kórdim», deıdi D.Káribek.
«Men úshin búgingi eń basty másele jastarǵa memleket tarapynan qoldaý bar ekenin sezindirý. Kóptegen jaqsy joba iske asyrylyp jatyr, resýrstyq ortalyqtar bar, qansha memlekettik baǵdarlama bolsa da, jastardyń budan habary az. Bul, álbette ózdiginen izdenbeıtin jastardyń, aqparatty durys jetkizbeıtin mamandardyń saldarynan týyp otyr. Sonymen birge túrli jobalardy qolǵa alyp bilim alýǵa, eńbek etýge qulyqsyz jastardyń sanyn azaıtý da búgingi kúnniń mańyzdy máseleleriniń biri. Jańa jobalar arqyly olardyń áleýmettenýine jaǵdaı jasaý josparda bar. Jastardy aıtqanda stýdentterdi eskermeý múmkin emes. О́ıtkeni elorda jastarynyń jartysy – stýdentter. Sondyqtan olardyń bos ýaqyttaryna, qoǵamdyq ómirine, áleýmettik jaǵdaıyna beı-jaı qaramaýymyz kerek. Otbasy máseleleri de bizdiń nazarymyzda. Ajyrasýdy azaıtýdy da negizgi maqsattyń biri retinde kórip otyrmyz. О́ıtkeni otbasy baqytty bolǵan kezde Otanymyz da berekeli bolmaq. Osy turǵyzda ajyrasý sebebin izdep, bul suraqty sheshýge arnalǵan qoldaýdy kúsheıtpekpiz», dedi Jastar saıasaty máseleleri basqarmasynyń basshysy.
Nur-Sultan qalasy ákimdiginde joǵary qyzmetke usynylǵan jastardyń biri – Laýra Demesinova. Ol «Astana» áleýmettik-kásipkerlik korporasııasy» ulttyq kompanııasy» AQ basqarma tóraǵasynyń keńesshisi qyzmetine taǵaıyndaldy.
Laýra Demesinova: «Asyǵy alshysynan túsken 300-diń arasynda bolý men úshin maqtanysh. О́ıtkeni iriktelgender tizimine ený halyq úshin qyzmet etýimizge, memleketimizdi odan ári damytýǵa zor úles qosýǵa múmkindik beredi. El bolashaǵy – jastar desek, kadrlyq rezervke ený osy jolda aıanbaı ter tógýge artylǵan senim», deıdi.
«Áleýmettik, korporatıvtik salada buǵan deıin birneshe jyl qyzmet ettim. Sondyqtan súıikti qalamdaǵy áleýmettik-kásipkerlik salaǵa úlesimdi qosqym keldi. Jańa qyzmetimde jastar men áıelder kásipkerligi men ınnovasııanyń ilgerileýine úles qosamyn dep senemin. Túrli áleýmettik toptarmen jumys istep, «Bolashaq» baǵdarlamasynyń túlekterin bilgenimen bólisýge, kásipkerlerge jańa ıdeıalar men jiger berý úshin kóbirek tartý josparda bar. Eger respýblıkamyzdaǵy barlyq áleýmettik-kásipkerlik korporasııalardyń jumysyna nazar aýdarsaq, olar áleýmettik mańyzy zor jobalardy júzege asyrýda. Elimizdiń túkpir-túkpirindegi atalǵan korporasııalar kishigirim kásipti úlken bızneske aınaldyrýǵa múmkindik beredi dep bilemin. Bul saladaǵy bilimim men tájirıbem elimizdiń bıznes, ınnovasııa, kásipkerlik salasyna úlesimdi qosýǵa múmkindik beretinine senemin», deıdi Laýra Demesinova.
О́tken aptada rezervshilermen kezdesken Nur-Sultan qalasynyń ákimi Altaı Kólginov prezıdenttik kadrlyq rezervtiń merıtokratııa prınsıpine sáıkes keletin jastarǵa arnalǵan áleýmettik lıft ekenin aıtyp ótken edi. Elorda ákimi qyzmetine kirisken jastarǵa memlekettik apparattyń negizgi mindetteriniń biri «Halyq únine qulaq asatyn memleket» tujyrymdamasyn júzege asyrý, jedel jáne tıimdi jumys isteý, sheshim qabyldaı bilý ekenin de jetkizdi. Altaı Kólginov «bilim ambısııadan joǵary turýy kerek», dep Memleket basshysy Qasym-Jomart Toqaevtyń sózin taǵy bir eske saldy.
