Búginge deıin Qytaı Halyq Respýblıkasynyń provınsııalarynda koronavırýstyq pnevmonııa juqtyrǵan 40 myńnan astam (42 638) adam tirkelip, onyń 1016-sy qaıtys bolǵan jáne 3 myńnan astam naýqas (3 996) emdelip shyqqan.
«Álemniń 27 elinde 448 adamnan koronavırýstyq ınfeksııa anyqtaldy. Degenmen, Qytaıda atalǵan vırýstyń taralý qarqyny 31 qańtar men 11 aqpan aralyǵynda 3,6 esege tómendedi (22 paıyzdan 6,1 paıyzǵa deıin). Iаǵnı, Qytaıda epıdemıologııalyq jaǵdaıdyń turaqtalyp kele jatqany baıqalady. Al Qazaqstanda koronavırýstyq ınfeksııaǵa qarsy kúres sharalary aıasynda 6 qańtardan beri memlekettik shekaralardaǵy pýnktterde 260 885 adam tekserýden ótti, onyń 30 852-si Qytaıdan kelgen. Jalpy, dene qyzýy joǵary jáne jedel respıratorlyq-vırýstyq ınfeksııanyń sımptomdary bar 140 adam aýrýhanaǵa jatqyzyldy, onyń 113-i emdelip shyqty, 27-si stasıonarda. Naýqastardyń eshqaısysynan koronavırýstyq ınfeksııa anyqtalǵan joq. Medısınalyq uıymdar Qytaıdan kelgen 23 059 adamnyń densaýlyǵyna turatyn jeri boıynsha 14 kún boıy monıtorıng jasaıdy. Búginde ınkýbasııalyq kezeńniń aıaqtalýyna baılanysty 15 478 adam monıtorıngten alyndy, 8 690 adam medısınalyq baqylaýda tur. Eshkimde koronavırýstyq ınfeksııaǵa kúdik tirkelgen joq», dedi Bas memlekettik sanıtarlyq dáriger.
Sonymen qatar ol Premer-Mınıstrdiń orynbasarynyń tóraǵalyǵymen elimizde koronavırýstyq ınfeksııanyń paıda bolýy men taralýyna jol bermeý jónindegi is-sharalardy úılestirý jóninde vedomstvoaralyq komıssııa qurylǵanyn, onyń quramyna barlyq múddeli memlekettik organdar men oblystardyń jáne Nur-Sultan, Almaty jáne Shymkent qalalarynyń ákimdikteri kirgenin tilge tıek etip, koronavırýstyq ınfeksııanyń ákelinýi men taralýyna jol bermeý jónindegi is-sharalar jospary iske asyrylyp jatqanyn alǵa tartty.
«QHR Ýhan qalasynan Reseı Federasııasyna (Túmen oblysy – 3 adam) jáne О́zbekstan Respýblıkasyna (5 adam) evakýasııalanǵan Qazaqstan Respýblıkasy azamattarynyń jaǵdaıy qanaǵattanarlyq, dene qyzýy joq, JRVI belgileri men shaǵymdary anyqtalǵan joq. Sondaı-aq búgin tańerteńgi saǵat 6:05-te Nur-Sultan qalasyna Qytaıdyń 36 qalasynan 217 qazaqstandyq azamat keldi. Barlyǵy medısınalyq jáne zerthanalyq tekserýden ótý úshin keminde 3 kún merzimge aýrýhanaǵa jetkizildi. Densaýlyq jaǵdaıy qanaǵattanarlyq», dedi Jandarbek Bekshın.
