AQSh-tyń Boston qalasynda sáýir aıynda oryn alǵan teraktige baılanysty qamaýǵa alynǵan qazaqstandyq stýdentter Azamat Tájaıaqov pen Dıas Qadyrbaev aqtalyp qalýy yqtımal. Bul týraly RT agenttiginiń orys bólimshesi habarlady.
«Azamat Tájaıaqov pen Dıas Qadyrbaev Bostondaǵy lańkestikke baılanysty ótkiziletin sot májilisterinde ózderiniń kinálary bar ekenin moıyndaǵylary kelip otyrǵan joq. Olardyń advokattary aıyptaýdyń negizi tııanaqsyz ekenin, al aıyptalýshylar ózderiniń kinálary joqtyǵyn málimdeýden qaıtpaıtynyn jetkizdi», - delingen onda.
«Alaıda, aıyptalýshylar óz kinálaryn moıyndaı qalǵan jaǵdaıda, olardy otandaryna qaıtarý múmkindigi tek jazalaryn ótegennen keıin ǵana múmkin bolady», - dep habarlady «Interfaks».
Qazaqstandyq 19 jasar eki stýdentke quqyq qorǵaý organdaryna kedergi keltirý maqsatymen kúdiktimen kelisimge kelgen degen aıyp taǵylyp otyr. Buryn habarlanǵandaı, olarǵa Djohar Sarnaevtyń keıin kúl-qoqys arasynan tabylǵan noýtbýk men feıerverk salynǵan rıýkzagin laqtyryp jiberdi, degen aıyp taǵylǵan bolatyn. Quqyq qorǵaý isine kedergi keltirdi degen jáne kelisimge keldi degen aıyptaýlar boıynsha qos stýdentke jalpy mólsheri 25 jylǵa deıin túrmede otyrý jazasy kesilýi múmkin.
Eske sala keteıik, aǵaly-inili Tamerlan jáne Djohar Sarnaevtar ústimizdegi jylǵy 15 sáýir kúni Bostonda ótken marafonnan keıin jarylys jasap, úsh adamnyń ajal qushýlaryna sebep boldy degen aıyp taǵylǵan edi. Sońynan bolǵan atys kezinde Tamerlan qaza tapty da, Djohar qolǵa tústi.
Aıyptaý qorytyndysynda osy iske oraı qamaýǵa alynǵan úshinshi adamnyń da aty atalyp jatyr. Ol qazaq stýdentteriniń sybaılasy sanalyp otyrǵan 19 jasar amerıkalyq Robel Fıllıpos kórinedi. Jas jigit federaldy tergeýshige jalǵan jaýap berdi degen aıyp taǵylypty.Ol sotqa deıin 100 myń dollardy kepildikke tólep, bostandyqqa shyǵypty.
Sultan Bozaıǵyr.
