Aımaqtar • 17 Aqpan, 2020

Shardara sý elektr stansasynyń qýaty ulǵaıa túsedi

756 ret

kórsetildi

3 mın

oqý úshin

Túrkistan oblysyndaǵy Shardara sý elektr stansasynda sońǵy jyldary júrgizilgen jańǵyrtýlar nátıjesinde onyń qýaty artyp, paıdalaný merzimi uzara túspek. 1967 jyly iske qosylǵan, belgilengen qýaty 100 MVt jáne 4 gıdroagregaty elektr stansanyń normatıv boıynsha qyzmet etý merzimi 25 jyl bolatyn. Joǵaryda aıtqanymyzdaı, tehnologııalyq jabdyǵy jarty ǵasyrdan astam ýaqyt boıy paıdalanylyp kele jatqan stansada jańǵyrtý jumystary nátıjeli júrgizilýde.

Ǵalymjan ELShIBAI

Shardara sý elektr stansasynyń qýaty ulǵaıa túsedi

Sý elektr stansasynyń mamandary «Andritz Hidro GmbX» kompanııasyndaǵy seriktesterimen birlese otyryp, №4 jańa gıdroagregatty qurastyryp shyqty. Nysandy túbegeıli jańǵyrtý jobasynyń bul sońǵy satysy, sonyń nátıjesinde stansanyń qýaty 26%-ǵa ulǵaıady. Bul kúnderi Shardara GES-inde baıqaý maqsatynda iske qosylǵan №4 jańa gıdroagregat test synaqtarynan ótýde. Týrbına men jabdyqtyń jumysy qadaǵalanyp, alynǵan nátıjelerge taldaý júrgizilýde. Mamandar jańa ımporttyq jabdyq jylyna qosymsha 57 mln kVt saǵat elektr energııasyn óndirýden tys, sý stansasynyń jumys isteý merzimin 35-40 jylǵa uzartýǵa múmkindik beretinin, sondaı-aq GES-ti paıdalaný senimdiligin arttyryp, apat deńgeıin tómendetetinin aıtýda.

Elý jyldan astam ýaqyt qyzmet etken Harkov zaýytynyń eski gıdrotýrbınalary aýstrııalyq-germanııalyq «Andritz Hidro GmbX» kompanııasynyń ónimine aýystyrylǵan. Jańa gıdroagregattar elektr energııasyn óndirýdi jylyna 480 mln kVt saǵattan 537 mln kVt saǵatqa deıin ulǵaıtýǵa múmkindik beredi. Bul óz kezeginde Túrkistan oblysyn sapaly elektr energııasymen qamtamasyz etýde jáne óńirdegi sý resýrstaryn paıdalanýdyń tıimdiligin arttyrýda úlken mańyzǵa ıe.

«Samuryq-Energo» AQ Úkimetpen baılanys jáne kommýnıkasııalar qyzmetiniń habarlaýynsha, jobanyń jalpy quny – 38 mlrd teńge. Qarjylandyrý 32%-ǵa «Samuryq-Energo» AQ-nyń qarajaty, 68%-ǵa nesıe esebinen iske asyrylýda. Joba merdigeri – aýstrııalyq-germanııalyq «Andritz Hidro GmbX» kompanııasy. О́tken jyldyń birinshi jartyjyldyǵynda árqaısysynyń qýaty 31,5 MVt bolatyn alǵashqy eki gıdroagregatty iske qosý arqyly Shardara GES-i elektr óndirýdiń jyldyq josparyn merziminen buryn oryndap shyqty. Josparlanǵan 378 000 myń kVt saǵattyń ornyna 464 841 myń kVt saǵattan astam elektr energııasy óndirildi. Qýaty 31,5 MVt bolatyn alǵashqy jańa gıdroagregat ótken jylǵy aqpanda iske qosylsa, sáýir aıynda ekinshi, al jeltoqsanda úshinshi gıdroagregat paıdalanýǵa berilgen bolatyn.

Endi tórtinshi gıdrotýrbına ornatylyp, test synaqtarynan ótkennen keıin, Shardara GES-inde stansanyń jobalyq qýaty 126 MVt-qa shyǵýǵa daıyndyq bastalady.

Túrkistan oblysy