Norvegııanyń premer-mınıstri Iens Stoltenberg eldegi parlament saılaýy qarsańynda Oslo mańyndaǵy jurtpen etene aralasyp, erkin sóılesý úshin jasyryn túrde jarty kún taksıst boldy. Bul týraly ITAR-TASS habarlady.
Osydan keıin úkimet basshysynyń basqasha jaǵdaıdaǵy rólin, ıaǵnı taksıst bolyp, kólik tizgininde otyrǵan shaǵyn beıneleıtin rolık Norvegııa Jumysshylar partııasynyń beıneportalyna salyndy. Ol birneshe saǵattyń ishinde 11 myń kórermenge ıe bolǵan.
Klıpte premerdiń kezekti jolaýshymen jattandy sózder tizbegin aıtyp, baratyn jerlerin belgilep alǵasyn, tereńdeý taqyrypqa – eldegi bilim berýdiń jaıynan bastap, bankter men korporasııalar basshylarynyń joǵary aılyǵyna deıingi aralyqtaǵy áńgimelerge barǵany kórinis beredi.
Bir qyzyǵy, taksıge mingen bir jolaýshydan ózgeleri ózderin ala bara jatqan eldiń eń joǵary basshysynyń biri ekenin ańǵarmapty. Taǵy bir aıtatyny, Stoltenberg aıdaǵan kólikke mingenderdiń birde-birinen jerine jetkennen keıin aqsha alynbapty.
Qazirgi is basyndaǵy premer basqaratyn Jumysshylar partııasy parlament saılaýyna bir aıǵa jetpeıtindeı ýaqyt qalǵanda, daýys jınaý boıynsha ózderiniń basty qarsylasy – konservatorlardan edáýir artta keledi eken. Sonymen birge, onyń kúshti saıası odaqtastary da joq. Sondyqtan bular úshin jurttyń saılaýǵa meılinshe kóbirek kelgenderi jaqsy. Al leıborıster 5 mıllıondyq halqy bar Norvegııada sońǵy kezderi áli eshkimniń shylaýynda kete qoımaǵan jurtty kim kóbirek tartyp áketse, solar jeńiske jetedi dep esepteıdi. Bul oraıda 54 jastaǵy Stoltenbergtiń harızmi men tanymalylyǵy kóp nárseni sheship ketýge tıis.
Murat Aıtqoja.
