Eń aldymen vıse-premer «Januıa» otbasy ınstıtýtyn qoldaý ortalyǵynyń jumysymen tanysty. Prezıdenttiń «Halyq únine qulaq asatyn memleket» tujyrymdamasy sheńberinde qurylǵan «Januıa» otbasylyq ınstıtýtyn qoldaý ortalyǵy ótken jyldyń 26 tamyzynan beri jumys isteıdi. Ortalyqta 12 memlekettik organ men mekemeden kórsetiletin 70 qyzmet «bir tereze­ge» biriktirilgen. Atap aıtqanda, densaý­lyq saqtaý, turǵyn úı, bilim berý, bız­nesti bastaý jáne memlekettik qoldaý alý, jumysqa ornalasý, qysqa merzim­di oqytý, ataýly áleýmettik kómek, psı­ho­logııalyq kómek, zańgerlik keńestiń bar­lyǵyn qamtyp qana qoımaı, «Kásipker ana» jobasyn júzege asyryp, motıva­sııalyq semınarlar men sheberlik synyptaryn da ótkizedi.

«Ortalyq ashylǵanynan bas­tap 11 myń­nan astam adam 24 403 másele boıyn­sha habarlasty. 18 404 másele boıyn­sha júıeli keńes berilse, ataý­ly áleýmettik kómek taǵaıyndaý, ju­mys­qa ornalasý, kýrstarda oqý sııaqty 5 999 másele sheshimin tapty. Otbasy­larǵa zańgerlik, psıhologııalyq jáne áleýmettik kómek kórsetiledi. Son­daı-aq ortalyq mamandary júze­ge asyrylyp jatqan memlekettik baǵ­dar­lamalar týraly egjeı-tegjeıli aqparat berip, densaýlyq saqtaý, bilim berý, baspana, bıznesti bastaý jáne memlekettik qoldaýǵa kezeń-kezeńimen júıeli keńes beredi», dedi «Januıa» otbasylyq ınstıtýtyn qoldaý ortalyǵy Jumyspen qamtý jáne áleýmettik qorǵaý bóliminiń basshysy Sáýle Nurǵojına.

Sáýle Nurǵojınanyń aıtýynsha, ortalyq Biryńǵaı jınaqtaýshy zeınetaqy qory, astanadaǵy Áleý­mettik-kásipkerlik korporasııasy, «Atameken» kásipkerler palatasy, «Turǵynúıqu­ry­lysjınaqbanki» mamandary tarapy­nan salalyq keńes beredi ári bilim bas­qarmasy jalpy bilim berý, balabaq­shalar, úıirmeler men seksııalar, oqýǵa grant­tar alý, mektep oqýshylaryna jol júrý bıletter alý jóninde; mektepke deıingi jastaǵy balalardy (7 jasqa deıin) balabaqshaǵa joldaý úshin kezekke qoıý boıynsha da qyzmet kórse­tedi. Mektepke qabyldaý, múgedek bala­lar­ǵa arnalǵan arnaıy bilim berý uıym­darynda qujattardy qabyldaý jaıly málimetter aıtylady.

Joǵaryda atap ótken «Kásipker ana» ortalyǵy da osynda jumys isteıdi. Munda analarǵa arnalǵan jeke bıznesti damytýǵa qoldaý kórsetý boıynsha mamandar kóp balaly jáne az qamtylǵan otbasylardaǵy áıelderdiń bıznes ashyp, úıde jumys isteýine múmkindik berý qarastyrylady. Mysaly, «Kásipker ana» jobasy bastalǵaly beri oqýǵa 434 áıel ótinish berip, qazir 250 áıel oqyp jatyr. Onyń ishinde negizgi daıyndyq kýrsyn 65 adam aıaqtap, on shaqtysy sátti jumys istep jatqan kórinedi. 2019 jyly 1 qarashada Memleket basshysy Qasym-Jomart Toqaev ortalyq jumysymen tanysyp, joǵary baǵalady jáne óńirlerde osyndaı ortalyqtar qurýdy tapsyrǵany esimizde.

Sondaı-aq ortalyqta ashyq qoǵamdyq qabyldaý jumys isteıdi. Onda qala áki­mi­niń orynbasarlary, aýdan ákimderi, bó­lim basshylary men basqa da uıym­dar­dyń basshylary azamattardy qabyl­­daıdy. Premer-Mınıstrdiń oryn­ba­saryna ataýly áleýmettik kómek­tiń (AÁK) jańa tásilderi de tanys­ty­­ryldy. «Eńbek» memlekettik baǵdar­la­masy arqyly ataý­ly áleýmettik kómek­ti alýshylarǵa eshqandaı oqýsyz jeńilde­til­gen shaǵyn nesıeler men granttar qarastyrylǵan.

E.Toǵjanov AÁK-pen qamtamasyz etý­diń jańa tásilderi ashyqtyqty, ádil­dikti jáne eńbekke yntalandyrýdy kóz­deýi kerek ekenin taǵy bir ret eskertti. «Ju­mys­syzdarǵa mindetti túrde jumys usy­ny­lady. Eger bul toptaǵy adamdar usy­nylǵan jumystan bas tartsa, olarǵa ataý­ly áleý­mettik kómek berilmeıdi. Mu­ny siz­der turǵyndarǵa jetkilikti deń­geıde tú­sin­dirýlerińiz qajet», dep tap­syr­dy E.Toǵjanov.

Osydan keıin Úkimet basshy­sy­nyń orynbasary №2 qalalyq emhana men Ortalyq jol aýrýhanasyna at basyn tiredi.  Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova atalǵan eki medısınalyq mekemeniń jumysymen tanystyrdy. №2 qalalyq emhana búginde 63 myńnan astam adamǵa qyzmet kór­­setedi. Onyń 18 myńy – balalar. Buǵan deıin aqyly bolyp kel­gen fızıo­te­rapevtik, massaj jasaý sııaqty ońaltý qyz­metteri qazir MÁMS aıasynda halyq­tyń barly­ǵyna tegin kórsetilýde.

E.Toǵjanov turǵyndardyń tegin me­dısınalyq kómektiń  kepilden­dirilgen kólemimen qanshalyqty qamtylyp otyr­ǵanyn jáne mindetti áleýmettik medı­sınalyq saqtandyrý júıesine medı­sı­nalyq kómektiń qandaı túrleri kiretinin surady.

«Alǵashqy medısınalyq-sanı­­tar­­lyq kómekpen (AMSK) elorda tur­ǵyn­­darynyń tek 1 paıyzy ǵana qamtyl­maǵan. Bul – 35 434 adam. Olardyń 22 myńy syrttan kelgender sanatynda. 10 myń adam tirkeýden bas tartqan. Áleýmettik medı­sınalyq saqtandyrý qorymen kelisimge otyrǵan 93 medısınalyq uıymnyń bárinde alǵashqy medı­sı­nalyq-sanı­tar­lyq kómektiń barlyq túri kórsetilip otyr», dedi Sáýle Qısyqova.

«Munda MÁMS-ke baılanys­ty kóp­tegen jumystar júrgizilipti. Pasıent­teriniń 92,5 paıyzy saq­tandyrylǵan. Ol úlken jetistik dep aıtýǵa bolady. Saqtandyrylmaǵan azamattardy min­detti túrde ári qaraı anyqtaý kerek. Onyń sany qazir belgili – 35 myń adam­ǵa deıin. Olardy anyqtaý tek medısı­na qyz­metkerleriniń jumysy emes. Ishki ister mınıstrligimen de muqııat qarasty­rý kerek. Ekinshiden Nur-Sultan qalasy­na syrttan keletin azamattar kóp. Or­ta eseppen halyqtyń 16 paıyzy syrttan keledi eken. Qajetti jaǵdaıda medısı­nalyq kómektiń barlyǵy sol azamattarǵa kórsetilip jatyr», dedi E.Toǵjanov.

Ortalyq jol aýrýhanasyna bar­ǵan Premer-Mınıstrdiń orynbasary ondaǵy medısınalyq qyzmet kórse­týdiń túrlerimen tanysty. Memle­ket basshysynyń tikeleı tapsyrma­symen ótken jyly tolyqtaı kúrdeli jón­deýden ótken medısınalyq nysan­nyń búgingi jumysyna oń pikir bil­dir­gen Eraly Toǵjanov: «Bul apatty jaǵ­daıdaǵy nysan bolatyn. 31 jeltoq­sannan bastap tolyqtaı jumysqa qaıta kiristi. Hı­rýrgııalyq blogy qaldy, ony jyl­dyń aıaǵyna deıin bitirý mindet­telip otyr. Ony tikeleı qada­ǵa­laýǵa alamyz. Merdigerlermen tike­leı jumys isteımiz. Aýrýhanaǵa berilgen tapsyrmanyń barlyǵy búginde oryndalǵan», dedi.