Sýretke «Halyq kompozıtory Estaı Berkimbaıulynyń Pavlodardaǵy Abaı atyndaǵy orta mekteptiń oqýshylarymen jáne ustazdarymen kezdesýi» dep anyqtama berilgen. Sýret 1940 jyly Pavlodar qalasynda túsirilipti.
Bir top adamnyń ortasynda otyrǵan ótkir kózdi, tymaq pen shapan kıgen ánshi Estaı. Ánshiniń osy kıimmen túsken basqa da fotolary bar. Máselen, ólketanýshy, jýrnalıst Aıtjan Bádelhan qurastyrǵan «Estaı» atty jınaqta ánshi-sazgerdiń dál osy tymaq pen shapandy kıip túsken sýreti usynylǵan. Oǵan «qyrqynshy jyldary Pavlodar qalasynda túsirilgen» dep anyqtama berilipti. Bizdińshe, Reseı murajaıynan tabylǵan jáne «Estaı» jınaǵynda usynylǵan eki foto da bir ýaqytta, bir jerde túsirilgen bolýy ábden múmkin.
Jalpy, qolymyzda Estaı Berkimbaıulynyń bes-alty ǵana fotosy bar. Sondyqtan Reseı murajaıynan tabylǵan bul sýret biz úshin qundy jádiger ekeni daýsyz.
Aıtpaqshy, «qazaq tarıhyna qatysty sýretterdi taýyp alýǵa bolady» dep Reseıdiń ortalyq memlekettik qazirgi zaman tarıhy murajaıynyń elektrondy mekenjaıyn usynǵan jýrnalıst Serikbol Hasan ekenin atap ótken jón. Murajaıdyń elektrondy qorynda (goskatalog.ru) bizdiń el men jerdiń tarıhyna qatysty kóp derek bar.
Farhat ÁMIRENOV,
jýrnalıst
