Mańyzdy sharaǵa arnaıy kelip qatysqan oblys ákimi Jeńis Qasymbek jıylǵan qaýymdy merekemen quttyqtap, bul kúnniń osydan tórt jyl buryn Tuńǵysh Prezıdent Nursultan Nazarbaevtyń bastamasymen qurylǵanyn eske saldy.
Belgili mesenat, «Rýhanı jańǵyrý» baǵdarlamasyn júzege asyrý boıynsha oblys ákiminiń shtattan tys keńesshisi, oblystyq máslıhattyń depýtaty Bekzat Altynbekov jalǵyzbasty ana, I toptaǵy múgedek Araılym Aldamqulovaǵa eki bólmeli páterdiń kiltin tabys etti.
– Men #jaqsylyqjasapjarysaıyq chelendj estafetasyn Nur-Sultan qalasynyń kásipkerlerinen qabyldap aldym. Bul chellendj muqtaj jandarǵa páter syılaýdy kózdeıdi. Qazaqstanda árbir otbasynyń óz baspanasy bolýy tıis. Biz, mesenattar men kásipkerler buǵan qol ushyn berýimiz kerek. Bul bizdiń qoǵam aldyndaǵy boryshymyz, – degen kásipker atalǵan chelendjdi Balqash qalasynyń kásipkerlerine joldady.
Sonymen qatar, atalǵan merekede «KKK «Injınırıng» JShS dırektory Aleksandr Kık belgili boksshy, eńbek sińirgen sport sheberi Abylaıhan Júsipovke bir bólmeli páterdiń kiltin syılady. Al Qazaqstan halqy Assambleıasynyń múshesi Shamıl Osın sportshyǵa turmystyq tehnıka satyp alýǵa 700 myń teńgege sertıfıkatyn tabys etti.
Qazaqstan halqy Assambleıasynyń atynan «Vaınah» oblystyq cheshen-ıngýsh ulttyq-mádenı ortalyǵynyń tóraǵasy Ývaıs Djanaev quttyqtap, balalar úıiniń tárbıelenýshisi Elızaveta Sedyshevaǵa qazaqtyń ulttyq mýzykalyq aspaby – qobyzdy syılady.
– HH ǵasyrdyń orta tusynda ondaǵan ult pen ulystyń balasy qazaq dalasyna kúshtep jer aýdaryldy. Osy qıyn-qystaý zamandy bastan ótkergender qazaq halqynyń gýmanızmin, janashyrlyǵyn eshqashan umytpaıdy, ol týraly únemi aıtyp júredi. Osy kómektiń arqasynda bizdiń ata-babamyz aman qaldy, búgin kúnde ósip-ónip, jańa urpaq tárbıelenýde, – degen Ývaıs Djanaev qolyn keýdesine qoıyp, óziniń qazaq halqyna degen alǵys sezimin jetkizdi.
Is-sharanyń sońyna taman Slambek Taýekeldiń «Jeruıyq» atty fılmi kórsetildi.
Qaraǵandy oblysy
