Biz – naǵyz qazaqstandyqtarmyz. Joldasym ekeýmiz qazir balalarymyz, nemerelerimizdiń qyzyǵyn kórýdemiz. О́zim muǵalim mamandyǵyn alyp, Keńes ókimeti kezinen oblys ortalyǵyndaǵy oqý-bilim bólimderinde qyzmet ettim. Odan keıin qoǵamdyq jumystarǵa aralasyp, Dostyq úıindegi Belarýs etnomádenı ortalyǵynyń qalyptasyp, ósip-órkendeýine úles qosyp kelemin.
Áli esimde, 2012 jyly «Dúnıejúzindegi belarýstardyń óneri men mádenıetiniń» festıvaline bizdiń elimizdiń atynan qazaqstandyq belarýstar qatystyq. Sonda bárimiz «Sálem saǵan, týǵan jer!», «Tolǵaý», «О́z elim», «Sarjaılaý» atty patrıottyq ánderdi qazaq tilinde shyrqadyq.
Al Mınskiniń tehnıkalyq ýnıversıtetinde Abaı mádenıet jáne til ortalyǵy ashylyp, №42 mektepke Muhtar Áýezovtiń esimi berilgen.
Pavlodardaǵy Belarýs etnomádenı ortalyǵy Mınskidegi qazaq dıasporasymen turaqty baılanysta. Belarýs eliniń elshiligimen, Bilim jáne Syrtqy ister mınıstrligimen tyǵyz qarym-qatynas ornatqanbyz. Men – Belarýs eli Syrtqy ister mınıstrligi konsýltatıvtik keńesiniń múshesimin. Bizdiń elimizdiń elshiligi usynǵan, al 17 jyl buryn qurylǵan birlestigimiz «Qazaqstan belarýstary qaýymdastyǵynyń» quramyna enedi.
Belarýs etnomádenı ortalyǵyn 2003 jyldan beri basqaryp kelemin. Ortalyqta «Karamel», «Krynısy», «Jaýranachak», «Praleskı», «Svıtanak», «Nadzeıa» ansamblderi jáne «Dabranach» vokaldy-aspaptar ansambli bar. Birlestikte alqa keńesi, ártúrli bólim, belarýs ardagerler keńesi, jastar qanaty, «Krynısy» jastar vokaldy ujymy, «Jaýranachak» bı ujymy, «Padarýnkı» teatr stýdııasy, qasyqtar ansambli, «Istokı» jastar klýby, «Belarýsachka» áıelder klýby jumys isteıdi.
Ortalyq halyqtyq salt-dástúrlerdi udaıy jańǵyrtyp otyr. О́ńirdegi belarýster turatyn aýyldarǵa baryp, etnografııalyq ekspedısııa jumystary jalǵasyn tabýda. Qazir «Kóktemdi shaqyrý» – «Gýkanıe vesny» belarýs halqynyń kóktem merekesine daıyndalyp jatyrmyz. Naýryz sekildi jańarý, tabıǵattyń jańǵyrýy ǵoı. «Gýkanıe» – qustar kelip, kóktemdi óz qanattarymen ákeledi degen senim. Mereke 14 naýryzdan bastalyp, kóktem aılarynda toılanady.
Árıne ózimdi baqytty sanaımyn. Qazaq jerinde, osy elde
týyp-óstim. Qazaqstandyqpyz dep maqtanamyz. Bizdi baýyryna basqan qazaq halqyna myń alǵys deımiz. Osy jer, osy el – bizdiń boıtumarymyzdaı.
Tipti, Elbasy Nursultan Nazarbaevpen tikeleı betpe-bet júzdesý baqyty birneshe ret buıyrdy. Bir jyly Qazaqstan halqynyń birligi kúnine oraı saltanatty jıyn ótti. Elbasy kesh sońynda delegattarǵa jaqyndap, árqaısymyzben amandasyp shyqty. Kezek maǵan kelgende ózimdi tanystyraıyn dep edim, Nursultan Ábishuly: «Men bilemin, sen pavlodarlyq belarýssyń!», degendegi qýanyshymdy kórseńiz. Adamnyń alaqany kóp nárseden syr shertedi. О́z basym Elbasymen amandasyp, qolyn alǵanda boıynan senimdilik, jylýlyq sezdim. Sol jylylyq qazaq eline, jerine tarap jatqandaı...
Lıýbov Bognat,
«Belarýs» etnomádenı ortalyǵynyń tóraǵasy
Pavlodar oblysy
