Baǵa ótken aptanyń basyndaǵy deńgeıde bolýy tıis

Ekonomıka • 17 Naýryz, 2020

Baǵa ótken aptanyń basyndaǵy deńgeıde bolýy tıis - Baqyt Sultanov

12 ret kórsetildi

Búgin Úkimet alańynda onlaın-rejımde ótken otyrys qorytyndysy boıynsha Qazaqstannyń saýda jáne ıntegrasııa mınıstri B. Sultanov TJ kezinde azyq-túlikpen jáne alǵashqy qajetti taýarlarmen qamtamasyz etý týraly aıtyp berdi. Bul týraly Premer-Mınıstrdiń baspasóz qyzmeti habarlady.

Egemen Qazaqstan

«Bizdiń qazirgi tańdaǵy basty mindetimiz – halyqtyń tirshiligin azyq-túlikpen jáne alǵashqy qajettiliktegi taýarlarmen úzdiksiz qamtamasyz etý. Bul Úkimet aldyna qoıylǵan mindet Memleket basshysynyń keshegi jarlyqtarynda jáne úndeýde aıtyldy. Osy kúrdeli jaǵdaıda azyq-túlik qaýipsizdigi tolyq qamtamasyz etiletini aıtyldy. Joǵaryda atap ótkenimizdeı, taýarlardy artyǵymen satyp alyp, dúrligýdiń qajeti joq. Barlyq saýda nysandary tolyq rejımde jumys isteıdi. Iri nysandar boıynsha shekteý bar, bul azamattarymyzdyń qaýipsizdigi úshin ǵana jasalǵan, degenmen, tutastaı alǵanda, ónimmen qamtamasyz etý tolyq kólemde uıymdastyrylady. Ol úshin qosymsha sharalar qabyldandy», — dep túsindirdi B. Sultanov.

Birinshiden, ákimdikter básekelestikti damytýdy qorǵaý organdarymen, sondaı-aq tutynýshylardyń quqyqtaryn qorǵaý organdarymen birlesip baǵa ózgeristerine turaqty monıtorıng júrgizip, baǵa kelisimderin boldyrmaıdy.

«Men baǵanyń negizsiz ósýine áreket jasaǵan kásipkerlerge baǵa ótken aptanyń basyndaǵy deńgeıine oralýy tıis ekenin habarlaımyn, eger bulaı bolmasa, onda barlyq qolda bar quraldar qoldanylatyn bolady, sonyń ishinde joǵaryda aıtyp ótkenimdeı, Prezıdent Jarlyǵynda aıtylǵandaı, Úkimetke shekti baǵalardy engizýge múmkindik berildi. Bul eń sońǵy shara, biraq bul bizdiń kásipkerler TJ kezinde bıznes tarapynan áleýmettik jaýapkershilikti de qamtamasyz etý qajettigin túsinýi úshin tıimdi qural. Osyndaı jaǵdaıda azamattardan paıda taýyp qalýǵa biz jol bermeımiz», — dep málimdedi saýda mınıstri.

Ekinshiden, taýarlardy teńdestirilgen jáne óńiraralyq bólý úshin vedomstvoaralyq ózara is-qımyl qamtamasyz etiletin bolady. Qazirgi jaǵdaıda óńirler azyq-túlikti jetkizýdi qamtamasyz etýmen belsendi aınalysady jáne óńiraralyq jetkizilim uıymdastyrylǵan. QR AShM tarapynan ónim óndirýshiler men treıderlerdiń tizimi boıynsha tıisti aqparat óńirlerge berildi.

Úshinshiden, «aınalym shemasy» dep atalatyn baǵany tejeýdiń naryqtyq quraldaryn qoldaný keńeıtildi, jergilikti atqarýshy organdar saýda jelilerimen belsendi jumys júrgizýde, olar azyq-túlik óndirýshilermen tikeleı jumys isteý jáne olardy salý boıynsha ózine mindettemeler alady, onyń ústine qazir jetkizý maýsymy, onyń ishinde ońtústiktegi kórshilerden bastalady jáne bul shema ótken jyly jaqsy nátıjeler kórsetti. Barlyq oblystar osy shemaǵa belsendi túrde qosylady.

Tórtinshiden, taýarlar tapshylyǵy oryn alǵan jaǵdaıynda Turaqtandyrý qorlary men Memlekettik materıaldyq rezervter komıteti de taýar ıntervensııalaryn júrgize alady, biraq mundaı tapshylyq bolady dep kútilmeıdi.

Besinshiden, jergilikti atqarýshy organdardyń belsendiligi pysyqtalýda jáne kóshpeli saýda baǵdarlary bekitiledi.

«Dúrlikpe jasaýdyń qajeti joq. Jergilikti atqarýshy organdar saýda nysandarymen birlesip, ónimniń qoljetimdiligin barynsha qamtamasyz etetin bolady. Tek iri saýda ortalyqtarynyń jumysy shektelgen, tek saýda-oıyn-saýyq bóliginiń jumysy toqtatylǵan, degenmen SOSO-lardaǵy fýd-korttarǵa ónimdi úıge jetkizýge kóshýge múmkindik berildi», — dep túıindedi B. Sultanov.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz