SQO polıseıleriniń qylmyskerlerdi aýlaýy jemisti bolyp, naq osy kúni TMD elderiniń sot tóreliginen jasyrynyp júrgen segiz qylmysker birden ustaldy. Soltústik Qazaqstan oblysy PD Krımınaldy polısııa basqarmasynyń bastyǵy, polısııa polkovnıgi Petr Klımovtyń aıtýyna qaraǵanda: «TMD elderi Ishki ister mınıstrleriniń arasynda qol qoıylǵan kelisimge sáıkes mundaı is-shara turaqty túrde júrgiziledi. Qazir jedel aqparatpen almasý da jetildirilgen. Sharaǵa polısııanyń basqa bólinisteriniń kúshteri de tartylǵan».
Ustalǵandardyń arasyndaǵy tórt qazaqstandyq jáne bir Reseı azamaty esirtki qylmystaryn jasaǵany, jalǵan qujattar istegeni, paraqorlyq, ekstremıstik is-áreket jasaýǵa shaqyrǵany jáne tonaǵany úshin reseılik polısııanyń izdestirýinde bolǵan. Osy qylmyskerlerdiń bári endi Reseıge etappen attandyrylatyn boldy.
Bulardan basqa Pavlodar oblysynyń 24 jasar turǵyny da ustalyp, qamaýǵa alyndy. Ol ózi turǵan Ertis aýdanynda bireýlerden kompıýterdi jóndeýge alyp, eki aıdyń ishinde ıesinen qosalqy bólshekterge dep 88 myń aqsha alyp, boı jasyryp júr eken. Oǵan qarsy Qylmystyq kodekstiń 90-baby - «Alaıaqtyq» boıynsha is sotqa joldanǵanymen kúdikti izin sýytqan. Endi ol da ustalyp, Pavlodarǵa jiberiledi.
Sondaı-aq SQO-da shartty túrde merziminen buryn bosatý rejimin oryndaýdan jaltarǵan eki adamnyń júrgeni anyqtaldy. Olar ishki ister organdaryn habardar etpeı, turǵylyqty jerin aýystyrý talabyn elemegen. Ekeýi de qamaýǵa alyndy.
Soltústik Qazaqstan oblysy
