Polısııa general-maıory Qaırat Dálbekov basqaratyn Túrkistan oblysy polısııa departamentiniń qyzmetkerleri búginde kúsheıtilgen rejımde qyzmet atqarýda. Iаǵnı, tótenshe jaǵdaı kezindegi talaptardyń saqtalýy kúndiz jáne túngi reıdter arqyly da qadaǵalanýda. «Osyndaı kezekti reıd barysynda oblys aýmaǵyndaǵy aýyldardyń birindegi toıhanada jıyn ótkizilgeni anyqtaldy. Atalǵan jaıtqa baılanysty polıseıler toıhana ıesi men toı ıesine Ákimshilik quqyq buzý kodeksiniń 476-baby «Tótenshe jaǵdaı rejımin buzý» boıynsha hattama toltyrdy. Sondaı-aq shara qabyldaý úshin qujattar qalalyq mamandandyrylǵan ákimshilik sotyna joldandy», dep habarlady oblystyq polısııa departamenti.
Sondaı-aq Saryaǵash aýdanynyń turǵyny «koronavırýs juqtyrǵan áıel aramyzda júr» dep áleýmettik jelilerde jalǵan aqparat taratqan. Jalǵan aqparat taratýshylardy jaýapkershilikke tartý týraly jábirlenýshiniń ótinishine baılanysty shuǵyl izdestirý jumystaryn júrgizgen Keles APB-nyń polısııa qyzmetkerleri kúdiktini anyqtap, ustaǵan. Qazirgi ýaqytta atalǵan jaıt boıynsha sotqa deıingi tergeý amaldary júrgizilip, tıisti saraptamalar taǵaıyndaldy. Kúdikti qolhatpen bosatylǵan. Al, jelide taralǵan aýdıohabarlamadaǵy áıeldiń 10 naýryzda Máskeý-Shymkent reısimen Germanııadan ushyp kelgeni belgili bolǵan. Áýejaıda ony medısına qyzmetkerleri qarsy alyp, Shymkent qalasyndaǵy páterine úı jaǵdaıyndaǵy karantınge jatqyzǵan. Qazirgi ýaqytta ol ambýlatorııalyq em qabyldaýda jáne densaýlyǵyna tónip turǵan qaýip joq ekeni anyqtalǵan.
