Túrkistan oblysynyń halqyna arnaıy málimdeme jasaǵan oblys ákimi О́mirzaq Shókeev osyndaı derekter keltirdi. Koronavırýs dertine baılanysty ońtústikke kirip-shyǵýdy táýlik boıy qadaǵalaý úshin ashylǵan arnaıy jasaqtalǵan bekette bolǵan oblys basshysy turǵyndarmen áńgimelesti. Jambyl oblysynan Túlkibas aýdanyna kireberistegi «Shaqpaq» beketinde ornatylǵan blok-post arqyly Almaty, Nur-Sultan qalalary men Jambyl oblysynan keletin barlyq avtokólikter júrip ótedi. Kúre joldyń boıynda ashylǵan bekette polısııa men dárigerler árbir kólikti toqtatyp, arnaıy qurylǵymen azamattardyń dene qyzýlaryn ólshep, tekserýden ótkizýde. Eki táýlik ishinde «Shaqpaq» beketteri arqyly ótken 6000-ǵa jýyq adam tekserilgen. Blok - postta arnaıy 4 teplovızor ornatylǵan. Shuǵyl áreket etý maqsatynda 30-den astam dáriger, medısınalyq jedel-járdem qyzmetiniń brıgadasy da jumyldyrylyp otyr. Budan bólek, temirjol, áýejaı, qalaaralyq beketter men shekaralarda sanıtarlyq jumystar qyzý júrýde. Indetpen kúrestiń kúndelikti jumys barysy oblys ákimdiginde ashylǵan sıtýasııalyq ortalyq arqyly qalyń halyq habardar etilýde.
«Bul indettiń taraýyna tosqaýyl qoıý úshin adamdar kúndelikti júris-turysyn shektep, qoǵamdyq oryndarǵa barmaýy qajet. Toıhana, meıramhanalar jabyldy, qoǵamdyq kólikterdi de toqtatamyz. Biz osyndaı jumystar arqyly bir jeńnen qol, bir jaǵadan bas shyǵaryp, indetti jeńýimiz kerek», – dedi О́mirzaq Shókeev.
Elbasy óz úndeýinde qıyn kezeńde el-jurtqa kómekteskisi keletin jáne járdem bere alatyn adamdardyń qarajaty jınaqtalatyn Respýblıkalyq qor qurýdy usyndy. Bul oraıda atalǵan qorǵa oblys ákimdigi, basqarmalar men oǵan qarasty mekemeler bir kúndik jalaqylaryn aýdarady. Bastamany qoldaǵan bıznes ókilderi tarapynan da qorǵa aqsha aýdarylmaq. Tótenshe jaǵdaıǵa baılanysty «Túrkistan» korporatıvtik áleýmettik damý qorynyń janynan qamqorshylyq keńesi qurylǵan. Bul qor oblystaǵy az qamtamasyz etilgen otbasylarǵa azyq-túlik pen gıgıenalyq zattar bóledi. Qajetti zattardy taratýǵa eriktiler, «Jas Otan» jastar qanaty belsene kirisýge nıet bildirip otyr.
«Alańdaýǵa negiz joq. Túrkistan oblysynyń aýmaǵynda koronavırýs tirkelgen joq. Saqtyq sharalary kúsheıtilgen tártipte júrip jatyr. Azyq-túlik qory jetkilikti, baǵalardy negizsiz ósirýge jol bermeımiz. Dál qazir búkil álem qıyn kezeńde tur. Alaıda, biz bul qıyn-qystaý ýaqyttan da birlik pen yntymaqtyń arqasynda aman-esen ótemiz dep senemin! Qazirgi tańda bizge tynyshtyq kerek, jalǵan aqparattarǵa senbeńizder. Resmı aqparat pen buqaralyq aqparat quraldaryna ǵana senińizder. Biz kúndelikti jaǵdaıdy qatań baqylaýda ustap otyrmyz. Biz birgemiz!», dep túıindedi málimdemesin О́mirzaq Estaıuly.
Oblys basshysy Túlkibas aýdanynyń ákimi Nurbol Turashbekovpen birge temirjol vokzalyndaǵy qolǵa alynǵan saqtyq sharalaryn pysyqtady. Jaýapty sala mamandarynyń jumyldyrýymen shoıyn jol beketterinde qaýipti indettiń taralýyna jol bermeý úshin arnaıy tekserý orny jasaqtalǵan. Mysaly, sońǵy eki táýlikte 16 poezd júrip ótip, 200-den astam jolaýshy tekserilgen.
Túrkistan oblysy
