Úndistan bıliginiń halyqaralyq reısterdi júzege asyrýǵa tyıym salǵanyna qaramastan, 17-22 naýryz aralyǵynda Delıdegi Qazaqstan Elshiliginiń dıplomattary bizdiń 538 azamatymyzǵa Qazaqstanǵa qaıtýǵa qolǵabys kórsetti.
17 naýryzda Qazaqstandyq «Kompas Tour» týroperatorynyń charterlik reısimen Goa shtatynan Almatyǵa 204 Qazaqstan azamaty keldi. Qalǵan 77 jolaýshy Goa - Delı - Almaty baǵytymen elge oraldy. Sonymen qatar, 204 qazaqstandyq Shrı-Lankadan «Týrıstik Qamqor» qory uıymdastyrǵan charterlik reıspen shyǵaryldy. Taǵy eki otandasymyz osy eldiń astanasy Kolombodan alternatıvti baǵytymen ushyp shyǵýǵa járdem kórsetildi. 10 qazaqstandyq týrıst Maldıv Respýblıkasynan Malı - Máskeý - Almaty baǵytymen ushyp ketti.
Qazaqstannyń Malaızııadaǵy elshiligi bizdiń azamattarymyzǵa qandaı da bir aıyppul sanksııalaryn tólemeı, áýebılet merzimin aýystyrýǵa kómek kórsetti.
Sonymen qatar, Malaızııadaǵy dıplomatarymyzdyń kómegimen 22 naýryzda Air Astana áýekompanııasynyń Kýala-Lýmpýr - Almaty baǵyty boıynsha turaqty reısimen 158 jolaýshy, onyń ishinde Indonezııa men Sıngapýrdan 80 tranzıttik jolaýshy oraldy.
Elshilik pen Air Astana áýekompanııasynyń qyzmetkerleri áýejaıda atalmysh jolaýshylarǵa ystyq tamaq uıymdastyrdy. Áýekompanııanyń aqparaty boıynsha, Kýala-Lýmpýr - Almaty baǵytyndaǵy sońǵy reıs 29 naýryzǵa josparlanǵan.
