Nur-Sultan qalasy Jastar saıasaty máseleleri basqarmasynyń Volonterler shtaby koronavırýs ınfeksııasynyń aldyn alý jáne asa qajetti taýarlarmen qamtamasyz etý úshin áleýmettik jaǵdaıy tómen otbasylarǵa medısınalyq maska, antıseptık quraldary jáne azyq-túlik paketterin úzdiksiz taratý jumystaryn júrgizip jatyr.
Nur-Sultan qalasy ákimdiginiń málimetine sáıkes, 19 naýryzdan bastap búginge deıin 1330-dan astam otbasyna kómek kórsetildi. Karantın rejimi kezinde bul mejeni 5000 otbasyna jetkizý josparlanǵan.
Al Almaty qalasyndaǵy Qyzyl Jarty Aı qoǵamynyń volonterleri «Jaqsylyq jasa» aksııasy aıasyn bastady. Shara aıasynda jastar karantın kezinde úıinen shyǵa almaı otyrǵan egde jastaǵy adamdardy azyq-túlikpen qamtamasyz etedi.
Qaraǵandy oblysy ákimdigi, «Saryarqa jastary» oblystyq volonterler shtaby «BIZ BIRGEMIZ» áleýmettik kómek kórsetý aksııasyn bastady. Al Jezqazǵan qalasynyń Jastar resýrstyq ortalyǵyna qarasty «Jyly júrek» volonterler uıymy qala kóshelerinde indettiń aldyn alý sharalaryna jumyldy.
«Jyly júrek» volonterler uıymy Jezqazǵan qalasynyń ortalyq kóshelerinde halyqqa tegin maska taratty. Olar maska úshin arnaıy mata satyp alyp, qorǵanysh quralyn ózderi tikken. Jezqazǵandyq volonter Marǵulan Kálı eki kúnniń ishinde jastar 600 maska úlestirgenin málimdedi. «Kúnine 300 betperde tigý josparda bar. Bul aksııa budan ári de jalǵasyn tabady. Tek qalanyń ortalyq kóshelerimen shektelmeı, vokzal sekildi adam kóp shoǵyrlanatyn oryndarǵa da barýdy oılap júrmiz», deıdi M.Ýálı.
Saqtyq sharalarynan bólek qaraǵandylyq jastar oblystaǵy 300-ge jýyq az qamtylǵan otbasylar men qarııalardyń úılerine turmysqa qajetti quraldar men antıseptıkter jetkizip berdi. Aımaq turǵyndaryna álemdi dúrliktirgen indet týraly aqparat berip, vırýstan qorǵaný joldaryn túsindirip, nasıhat júrgizip júr.
«Volonterler pandemııa kezinde qoldan kelgenshe kómek kórsetýge ázir. Aksııanyń ótýine úles qosyp, qarttar men kóp balaly otbasylardy azyq-túlikpen qamtamasyz etýge atsalysqan Qaraǵandy oblysynyń kásipkerlerine de alǵysymyzdy bildirgimiz keledi. Olar sharanyń alǵashqy kúninde-aq 50 qap azyq-túlik usyndy. Bul ıgi is áli de jalǵasatynyna senemiz», dedi uıymdastyrýshylar.
Karantın kezinde qarttar men kóp balaly otbasylardy qoldaý maqsatynda «Saryarqa Jastary» oblystyq volonterler shtaby jáne «Tamshy KZ» qaıyrymdylyq qorynyń bastamasymen jastar qarııalardyń úıinen shyqpaýy úshin basqa da qajettilikterine kómektesip júr. Bul sharany oblystyń basqa aýdandaryndaǵy jastar da qoldap, kómegin kórsetti. Máselen, Qarqaraly aýdanynyń JasStar volonterlik jelisiniń volonterleri 2 otbasyna azyq-túlik tasyp, qolǵabys kórsetti. «Álemdik pandemııa kezinde bir-birimizge janashyrlyq tanytý, qamqor bolý, birligimizdi saqtaý – árbir azamattyń paryzy dep bilemiz!», deıdi volonterler.
Azyq-túlikpen qamtamasyz etý, saqtyq sharalaryn túsindirýmen qatar halyqtyń qaýipsizdigin de esten shyǵarmaǵan jastar qoǵamdyq tártip pen qaýipsizdikti baqylaýǵa aldy. Almaty shaharyndaǵy polıseılerge qoǵamdyq tártipti qamtamasyz etýge kómektesý úshin, 500-ge jýyq volonter jumyldyryldy. Volonterler tártip saqshylarymen birge kóshe aralap, turǵyndarǵa túsindirý jumystaryn júrgizýde. Kóshege shyqqan jurtqa karantın talaptary men vırýstyń qaýipti ekenin túsindirip, dúken, dárihanalardaǵy ahýaldy baqylaýǵa aldy.
Al qaraǵandylyq jastar Tótenshe jaǵdaılar komıtetimen birlesken reıdke shyqty. Volonterler turǵyn úı sektorynda ýly gazben ýlanýdyń aldyn alý maqsatynda úılerdi aralap, gaz qubyrlarynyń jumysyn baqylady. Olar ýly gaz datchıkteri arqyly gazdan ýlanýdyń aldyn alýǵa bolatynyn túsindirdi. Úıde ýly gaz mólsherden assa, datchıkter belgi berip, adam ómirine qaýipti aldyn ala eskertetinin aıtty.
