Jaǵdaıdyń ýshyǵyp bara jatqanyn tilge tıek etken shahar basshysy óziniń Instagram paraqshasynda:
«Qurmetti almatylyqtar! Koronavırýsqa qatysty jaǵdaı biz oılaǵannan áldeqaıda qaýiptirek boldy. Qaýipti jete túsinbeý – jaýapsyzdyq jáne qylmyspen para-par. О́kinishtisi sol, karantınge nemquraıly qarap, shekteý sharalaryn saqtamaı, halyqtyń ómirin qaýip-qaterge tikken jandar azaımaı tur. Jumysyn jalǵastyryp jatqan sport zaldary men meıramhanalar, sanıtarlyq normalardy saqtamaǵan azyq-túlik dúkenderi anyqtaldy. Mamandardyń sózine qulaq aspaı, kóshede qydyryp júrgen turǵyndar da bar. Tártipke baǵynbaǵandar úshin qatań shara qoldanylady», – dep jazdy.
Adamzatqa qater tóndirgen indetten ońbaı japa shegip jatqan Italııa, Ispanııa, AQSh memleketteri azamattarynyń jan aıqaıyn jetkizgen túrli beınejazbalar áleýmettik jelilerde tarap jatyr. Bul beınerolıkter – máseleniń mańyzdylyǵyn eskerip, saqtyq sharalaryn berik ustanýǵa úndeıdi. Qoǵamnyń tutastyǵy, memlekettiń beriktigi, aınalyp kelgende óz otbasynyń, jeke basynyń amandyǵy úshin azamattar aǵymdaǵy jaǵdaıdan sabaq alyp, qaýipsizdik sharalaryn qatań saqtasa ıgi.
