Bıznesmender úshin úsh aı merzimge jaldaý tólemderi alynbaıdy

Bıznes • 26 Naýryz, 2020

Bıznesmender úshin úsh aı merzimge jaldaý tólemderi alynbaıdy

23 ret kórsetildi

Almaty qalasy Kásipkerler palatasynyń dırektory Narıman Ábilshaıyqov ońtústik astanadaǵy bıznesti qoldaý sharasyna oraı memlekettiń salyq mindettemelerin keıinge qaldyrýy, jalǵa alýǵa qatysty, t.b. máseleler týyndap otyrǵanyn jetkizdi.

Elvıra SERIKQYZY

Almatyda 2020 jyldyń 1 naýryzynda statıstıkalyq málimetter boıynsha, 106 007 jeke kásipkerlik jáne zańdy tulǵalar jumys isteıdi. Ondaǵy qyzmetkerlerdiń naqty sany 346 899 adam. Almaty qalasynyń 19 naýryzdan bastap karantınge jabylýyna baılanysty ári 26 naýryzdan jańa rejım kúshine enýine oraı saýda jáne qyzmet kórsetý salasyndaǵy nysandardyń jumysy toqtatylady. Al azyq-túlik dúkenderi men dárihanalar jumysyn jalǵastyratyn bolady.

Narıman Ábilshaıyqovtyń aıtýynsha, biregeı ekonomıkalyq qurylymy bar Almaty qalasynda 70% saýda jáne qyzmet kórsetý salalary jumys istese, bul nysandarda 240 myńnan astam adam eńbek etedi. «Árbir qazaqstandyq, sonyń ishinde kásipkerler ulttyq qaýipsizdik máseleleriniń joǵary turǵanyn túsinedi. Biz kútetin ekonomıkalyq prosester keıinge qaldyrylýy múmkin. Tótenshe jaǵdaı rejımi engizilgen birinshi kúninen bastap, biz jedel sharalar qabyldadyq, senim telefondary jumys isteıdi, búginde bıznes tarapynan 8 myńnan astam qońyraý kelip tústi. Eger kásipkerlerdiń tarapynan qoıylǵan suraqtardy júıeleıtin bolsaq, bul qoldanystaǵy qaryzdardy, ekinshi deńgeıli bankter aldyndaǵy nesıelik mindettemelerdi keıinge qaldyrý máseleleri, bul suraq palataǵa kelip túsken ótinishterdiń 35% quraıdy», - dep atap ótti N. Ábilshaıyqov.

Aǵymdaǵy jyldyń 20 naýryzynan bastap memlekettik, kvazımemlekettik jyljymaıtyn múlik obektileri boıynsha bıznesmender úshin 3 aı merzimge jaldaý tólemderin esepteý toqtatyldy.

Qazirgi tańda Palata men qala ákimdigi birlese kommersııalyq úı-jaılardy jalǵa alatyn shaǵyn jáne mıkrobıznes sýbektilerin, jaldaý tóleminen bosatý múmkindigin birlesip qarastyrýda.

Almaty qalasynyń Kásipkerler palatasy janynan saýda jáne qyzmet kórsetý salasyn monıtorıngileý boıynsha jumys toby quryldy. Jumys tobynyń basty mindetteriniń biri – barlyq jalǵa berýshilerden-saýda ortalyqtarymen tyǵyz baılanysta jumys isteý. Jumys tobynyń músheleri 25 naýryz kúni 89 kásipkermen kezdesip, olardyń barlyǵyna derekterdi toltyrý týraly keste jiberildi. Taldaý jumystary kórsetkendeı, jalǵa berýshilerdiń kópshiligi TJ jáne karantın kezeńindegi tólemder boıynsha jalǵa alýshylarǵa demalys berýge nemese keıinge qaldyrýǵa qarsy emes.

Biraq jalǵa berýshiler tarapynan birqatar sheshilmegen máseleler bar, atap aıtqanda, qyzmetterdiń toqtatylýy men shyǵyndarǵa baılanysty.

«Almatyda 100-ge jýyq iri saýda jáne oıyn-saýyq ortalyǵy jumys isteıdi. Iri ortalyqtar TJ kezinde, jalǵa alýshylardy jaldaý aqysyn tóleýden bosatý týraly sheshim qabyldady. Mysalǵa, mundaı sheshimderdi «Moskva» oıyn-saýyq ortalyǵy jáne «Avtosıtı» saýda ortalyqtary qabyldady. Alǵashynda qaladan shyǵý jáne kirý boıynsha máseleler boldy. Bul máseleler búgingi kúni jedel shtabpen tolyq sheshimin tapty. Qazirgi ýaqytta 27 blokposttar jumys isteıdi, ákimdiktiń ókilderi jumys isteýde, Palata qyzmetkerleri kún saıyn osy blokpostarǵa baryp turady», - dep atap ótti spıker.

TJ jáne karantın engizilgen ýaqyttan bastap, azyq-túlik taýarlaryn «jasyl dáliz» arqyly ótkizýge baılanysty Palataǵa 220-dan astam qońyraý kelip túsken. N.Ábilshaıyqovtyń aıtýynsha, bıznes ókilderiniń tarapynan aıtylǵan barlyq máseleler boıynsha qoldaý sharalary qarastyrylýda.

ALMATY

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz