Sýretti túsirgen Erlan Omar, «EQ»
Klınıka dırektory Muhtar Tóleýtaevtyń aıtýynsha, qazirgi ýaqytta vırýs juqtyrǵan 28 adamnyń jaǵdaıy qalypty. «Kúndelikti temperatýra, qan qysymdary tekserilip, dárigerler men meıirbıkelerdiń baqylaýyndaǵy jandarda klınıkalyq aýrýdyń belgileri joq, tek tapsyrǵan synamalarynan vırýs tabylǵany bolmasa», degen Muhtar Esenjanulynan ortalyqtyń jumysynyń jaı-japsaryn surap bildik.
Halyq «Jaman aıtpaı jaqsy joq», «Qamdanǵan qapy qalmaıdy» dep beker oı tolǵamasa kerek. Sondyqtan jan-jaqty qamdanǵan ortalyqta búginde 60-tan astam dáriger men basqa medısına qyzmetkerler kúni-túni úılerine ketpesten ortalyqta tótenshe jaǵdaıdyń qajettiligine oraı jumys atqarýda. Vırýstyń adam ókpesine tıgizer zııanyn, sondaı ýaqytta ózdiginen tynys ala almaı qalatynyn esepke ala otyryp, qaladaǵy ózge klınıkalardan oǵan qajetti apparattar jetkizilipti. Qazir apparattar qoldanysqa daıyn. Sondaı-aq basqa emdeý mekemelerinen kómekke dárigerler keldi. Al emdeý sharalary Densaýlyq saqtaý mınıstrliginiń halyqaralyq standarttar negizinde bekitken hattamalary boıynsha júzege asyrylady, alaıda sol hattamalardy qoldanbaı-aq aman ótsek deımiz, deıdi dárigerler qaýymy.
Kúni boıyna qorǵanysh kıimderimen tumshalanyp eńbek etý ońaı emes, biraq bul medısına qyzmetkerleriniń ózderi úshin de, pasıentter men karantınde jatqan 245 adam úshin de mańyzdy. Baqylaýdaǵy adamdardy kúnine birneshe ret tekserý tolyqtaı qorǵanysh kıimin kııýmen ǵana atqarylady. Bul qaýipsizdik úshin qajetti qadam, al mundaı kıimder jetkilikti. Kópsalaly ortalyq vırýs dep qana otyrǵan joq, josparly jumystary da júrip jatyr, al indet ilmegine ilikkenderdi qamtýǵa ortalyqta 387 oryn bólinipti.
Bul vırýs tutas qoǵam úshin syn bolyp otyr. Meni bul indet aınalyp ótedi dep eshkim de kepildik bere almaıdy. Sondyqtan ár adam jeke basynyń tazalyǵyn saqtaýmen qatar, kópshilik jınalatyn jerden aýlaq júrgeni, qoǵamdyq oryndarǵa barmaǵany abzal. Ol birinshiden, ózin keselden saqtaǵany, ekinshiden, mańaıyn, jaqyn-jýyqtaryn qorǵaǵany bolyp shyqpaq, al bizder dárigerler qolymyzdan kelgendi atqarýǵa tas-túıin daıynbyz. Búginde qan quramynda vırýs bar adamdarda klınıkalyq belgiler bolmaǵanyna qaramastan, jaǵdaıǵa jiti qaraý mindetimiz, – deıdi klınıka basshysy bizben áńgimesinde.
