Belgili jýrnalıst, kásipker Arman Shoraev Zerendi aımaǵyndaǵy «Aurora Garden» demalys úıin koronavırýs epıdemııasymen kúres barysynda paıdalanýǵa berip otyr. Oblystyq densaýlyq saqtaý basqarmasynyń basshysy Súlen Ilııasovtyń aıtýyna qaraǵanda, kásipkerdiń demalys orny aýdandyq aýrýhanamen baılanystyryla paıdalanylady. Demalys ornynda birneshe jatynjaılar, ashana, monsha bar. Internet jelisi jumys isteıdi.
–Qazirgi kúni demalys ornynda jumys isteý úshin qansha dáriger men orta býyn medısına qyzmetkerleri kerek ekenin eseptep jatyrmyz,–deıdi basqarma basshysy Súlen Ilııasov,–mamandar jetispeıtin bolsa Kókshetaý qalasy men Sandyqtaý aýdanyndaǵy medısına mekemelerinen shaqyrýǵa bolady.
Densaýlyq saqtaý basqarmasynyń basshysynyń aıtýyna qaraǵanda, kásipkerdiń bul qamqorlyǵy der kezinde jasalǵan janashyrlyq kómek bolyp otyrǵan kórinedi. Endigi arada dárigerler eger adamdar indetke dýshar bolyp jatsa, tamyljyǵan tabıǵat aıasynda emdeýge múmkindik alyp otyr. Elde jany ashıtyn erlerdiń isi alǵysqa ábden laıyq.
Zerendi aýdany,
Aqmola oblysy
