Foto: figure-skaters.ru
Mılan Olımpıadasynyń chempıony Álem birinshiligine nelikten qatyspaıdy?
Mıhaıl Shaıdorov Mılan tórindegi tórtjyldyqtyń basty básekesinde elimizde mánerlep syrǵanaý mektebiniń joǵary deńgeıi qalyptasqanyn jarqyn jeńisimen aıqyndady. Dese de, Olımpıada chempıony álem birinshiligine qatyspaıdy. Qazaqstannyń mánerlep syrǵanaý odaǵy oǵan salmaqty sebep baryn atap ótti.
«2025 jyldyń qańtar 2026 jyldyń aqpan aıyna deıingi kezeńde Mıhaıl Shaıdorov álem chempıonaty, Azııa oıyndary, Tórt qurlyq chempıonaty, Gran-prı kezeńderi men fınaly, sondaı-aq Olımpıada oıyndaryn qosa alǵanda aýqymdy 10 halyqaralyq jarysqa qatysty. Bul – fızıkalyq jáne psıhologııalyq turǵydan óte úlken júkteme. Biz chempıonymyzǵa tolyqqandy demalys berýdi jón kórdik. Sondaı-aq ol osy ýaqyt aralyǵynda tıisti qalpyna keltirý jáne ońaltý sharalarynan ótedi», dep túsindirdi Qazaqstan mánerlep syrǵanaý quramasynyń bas bapkeri Ásem Qasanova.
Pragadaǵy tartys tájirıbeli mánerlep syrǵanaýshylar men jas talanttar arasynda órbıdi
Jyl saıynǵy dástúrli birinshilikke álemniń 50 elinen 200-ge jýyq úzdik mánerlep syrǵanaýshy qatysady. Pragada uıymdastyrylatyn «muzdaǵy básekede» tartys tájirıbeli sportshylarmen qatar «jas juldyzdar» arasynda órbimek.
Máselen, Mılandaǵy Olımpıadanyń kúmis jáne qola júldegerleri Iýma Kagııama men Sıýn Sato, 8-oryn alǵan AQSh ókili Ilıa Malının, sondaı-aq saladaǵy tájirıbeli mánerlep syrǵanaýshylar Adam Sıao Hım Fa (Fransııa), Danıel Grassl (Italııa), Matteo Rısso (Italııa), Djeıson Braýn (AQSh) da chempıondyq ataqty ıelenýge úmitti.
Adýyndy qarsylastarmen aıqasqa Qazaqstan atynan 2003 jyly týǵan Taraz qalasynyń týmasy Dıas Jırenbaev túsedi. Dıas Jırenbaevtyń qolyna Halyqaralyq konkıshiler odaǵy uıymdastyratyn básekede óner kórsetý joldamasy jaıdan-jaı berilgen joq. Ol Germanııada ótken halyqaralyq NRW Trophy 2025 týrnırinde elimizdi laıyqty túrde tanystyra aldy. Sportshy osy synda 4-orynǵa ıe bolyp, mańyzdy tehnıkalyq mınımýmdy oryndady.
Nadejda Pareskaıa daýy: Bizdiń tóreshi Shaıdorov pen Samodelkınanyń ónerin ádeıi tómen baǵalady ma?
Bul nátıje oǵan Pragada ótetin álem chempıonatynda óner kórsetýge múmkindik syılady. Búginde halqymyz dańqty mánerlep syrǵanaýshy Denıs Ten men qysqy Olımpıada oıyndarynda elimizge 32 jyldan keıin altyn medal tartý etken Mıhaıl Shaıdorovtyń izin jalǵaýshy talant týraly ne biledi?
Muz aıdynǵa alǵash ret 9 jasynda bardy
Dıas mánerlep syrǵanaýmen salystyrmaly túrde kesh – 9 jasynda Astana qalasyndaǵy Oqýshylar saraıynda aınalysa bastaǵan. Jas darynnyń alǵashqy bapkeri – Vladımır Vıktorovıch Rýdı.
Al álem chempıonatyna qatysýǵa múmkindik alǵan mánerlep syrǵanaýshyny 2021 jyldan bastap Almatydaǵy Denis Ten Academy akademııasynda Oksana Ten baptap júr.
Dıas Jırenbaev jyl ótken saıyn muzdaǵy kórsetkishin jaqsartyp keledi. Ol 2024-2025 jylǵy maýsymda sport sheberleri arasynda mánerlep syrǵanaýdan ótken Qazaqstan chempıonatynda birinshi tuǵyrdan kórinse, jalpy el birinshiliginde 4 ret kúmis, 2 ret qola medal qanjyǵalaǵan. Otandasymyz halyqaralyq arenada da sátti óner kórsetip, ISU (Halyqaralyq konkıshiler odaǵy) qamqorlyǵymen ótetin kóptegen halyqaralyq týrnırlerde baq synap júr. 2022 jyldan beri Qazaqstan atynan Tórt qurlyq chempıonatynda óner kórsetip keledi. 2025 jyly Harbınde ótken Qysqy Azııa oıyndary men Qysqy Ýnıversıadada baq synady. Sondaı-aq ol ISU Challenger Series týrnırine turaqty túrde qatysyp, sheberligin shyńdap keledi.
Aıta keteıik, Dıas halyqaralyq jarystardan bos qaıtyp júrgen joq. Máselen, 2022 jylǵy Denis Ten Memorial Challenge týrnırinde kúmis júlde ıelense, 2024 jyly Lıýksembýrgte ótken Coupe du Printemps 2024 halyqaralyq týrnıriniń jeńimpazy atandy. 2023 jylǵy Denkova-Staviski Cup 2023 jáne 2022 jylǵy Sofia Trophy 2022 halyqaralyq týrnırlerin qola medalmen qorytyndylady.
Mánerlep syrǵanaýshynyń komandasy qazirgi ýaqytta Dıas Jırenbaevtyń Pragada ótetin álem chempıonatyna qyzý daıyndalyp jatqanyn jetkizdi.
