Jambyl oblysy ákimdiginiń habarlaýynsha, tranzıttik avtokólikter, sondaı-aq ónerkásiptik, aýyl sharýashylyǵy kásiporyndarynyń úzdiksiz jumys isteýin jáne tynys-tirshiligin qamtamasyz etý úshin azyq-túlik taýarlary, dárilik zattar jáne medısınalyq buıymdar, óndiristik taýarlar men materıaldar tasıtyn avtokólikterdi qospaǵanda, avtokólik quraldarynyń barlyq túrlerine Jambyl oblysy men Taraz qalasynyń aýmaǵyna kirýine jáne shyǵýyna tyıym salynady. Sonymen qatar, iri saýda ortalyqtarynyń, saıabaqtardyń, monsha keshenderiniń, sanatorııalyq-kýrorttyq nysandardyń, ınternet-klýbtardyń, kólik jýý oryndarynyń, sulýlyq salondarynyń, shashtarazdardyń, azyq-túlik emes avtomobıl, kıim-keshek, qurylys bazarlarynyń qyzmeti toqtatyla turady. Bul rette taýarlardy jetkizý arqyly ótkizý múmkindigi saqtalatynyn aıta ketken jón. Sol sııaqty, bólshek saýda bazarlary sanıtarlyq-dezınfeksııalyq rejımdi mindetti túrde saqtaı otyryp, saǵat 10.00-den 17.00-ge deıin jumys isteıtin bolady. Al, kóterme azyq-túlik qoımalary men bazarlary, sýpermarketter, azyq-túlik saýda oryndary, úı janyndaǵy dúkender men dárihanalar qalypty rejımde óz jumysyn jalǵastyrady. Tamaqtaný oryndarynyń jumysy toqtatylyp, asa qajet jaǵdaıda bolmasa úıden shyǵý shekteledi. Jáne ákimdik otbasy múshelerin qospaǵanda, 3 adamnan kóp adamdardyń qozǵalysyna shekteý qajettigin, kámeletke tolmaǵandardyń eresek adamsyz júrýine tyıym salynatynyn jáne 65 jastan asqan azamattarǵa ózin-ózi oqshaýlaý rejımin saqtaý qajettigin eskertedi. Alaıda, oblys turǵyndarynyń tynys-tirshiligin qamtamasyz etetin polıseılerdiń, medısınalyq, avarııalyq-qutqarý jáne basqa da kommýnaldyq jáne shuǵyl qyzmetterdiń qyzmeti shektelmeıdi.
Sonymen qatar, Qordaı aýdanynyń aýmaǵynda koronavırýstyq ınfeksııanyń buǵan deıin anyqtalǵan jaǵdaılaryna baılanysty qosymsha shekteý sharalary engiziledi. Aýdannyń eldi mekenderi arasynda halyqtyń, onyń ishinde qoǵamdyq kóliktiń qozǵalýyn barynsha shekteý, jumys ornynan anyqtama nemese qyzmettik kýáligi bolǵan kezde ǵana turǵylyqty jerinen jumys ornyna deıin jáne keri qaraı júrip-turý, shuǵyl jaǵdaı boıynsha medısınalyq mekemege júginý qarastyrylǵan. Sonymen qatar, aýdan turǵyndaryna týysqandaryna, tanystaryna, kórshilerine, áriptesterine jáne taǵy da basqa adamdarǵa barýǵa jol berilmeıdi. Sondaı-aq, munda da shekaralyq baqylaý-ótkizý pýnktterinde tranzıttik júk avtokólikterin, sondaı-aq, Jambyl oblysynyń ónerkásip, aýyl sharýashylyǵy kásiporyndarynyń úzdiksiz jumys isteýin jáne tynys-tirshiligin qamtamasyz etý úshin azyq-túlik taýarlary, dárilik zattar jáne medısınalyq buıymdar, óndiristik taýarlar jáne materıaldary bar avtokólikti qospaǵanda, avtokóliktiń barlyq túrleriniń saǵat 19.00-den 10.00-ge deıin kirýine tyıym salynady. Koronavırýstyq ınfeksııanyń bolýyna qatysty zerthanalyq tekserý nátıjelerin alǵanǵa deıin Qazaqstan Respýblıkasynyń aýmaǵyna keletin azamattardy bir kúndik stasıonarlyq karantınge mindetti túrde ornalastyrý engizilip, aýdanda qoǵamdyq kólik pen taksı qozǵalysy shekteledi.
Jambyl oblysy
