ÚLKEN QAMQORLYQ

Prezıdent poshtasynan Memleket basshysy N.Nazarbaevtyń atyna Qyzylorda oblysy, Syrdarııa aýdanynyń turǵyny Bekzada Áljanovanyń atynan hat kelip tústi. Kúmis alqa ıegeri B. Áljanova Prezıdenttiń bıylǵy jylǵy Qazaqstan halqyna Joldaýynda aıtylǵan balalardy mektep jasyna deıingi oqytýmen jáne tárbıemen qamtamasyz etýdi jolǵa qoıatyn “Balapan” baǵdarlamasyna zor rızashylyq bildirgen. Hatynda “Sizdiń tapsyrmańyzǵa oraı Syrdarııa aýdanyndaǵy tereńózektik ata-analar zor qýanyshqa bólendi. Sebebi, Tereńózek kentinde 50 oryndyq eki topqa arnalǵan “Nurbóbek” balalar baqshasy paıdalanýǵa berildi. Men de ózimniń nemerelerimdi osy balabaqshaǵa qabyldaǵanyna qýanyshtymyn jáne Sizge sheksiz alǵysymdy bildiremin. “Nurbóbek” balabaqshasy sońǵy úlgidegi jobamen salynǵan, ásem bezendirilgen, uıadaı jyly. Balalardyń jaıly balabaqshada tárbıelenýine, ata-analardyń alańsyz eńbek etýine osyndaı jaǵdaı jasalýy úlken qamqorlyq dep baǵalaımyn”, dep jazady B. Áljanova. Avtor hatyn túıindeı kele, ár otbasyna qamqorlyq jasap, balalardyń bolashaǵyna erekshe mán berip otyrǵan el Prezıdentine zor densaýlyq, uzaq ǵumyr tileıdi.