Tótenshe jaǵdaı kezinde áskerı qyzmetshilerdi azamattyq qorǵanys jumystaryna tartý qajettilikten týyndap otyr. Búginde QR Prezıdenti – Qarýly Kúshterdiń Joǵary Bas qolbasshysynyń tapsyrmasyna sáıkes dezınfeksııalaý jumystarynyń aýmaǵy keńeıtilip, bıologııalyq qorǵanys bólimsheleriniń sany artty.
Nur-Sultan qalasynda dezınfeksııalaý jumysy qalaı júrgizilip jatqandyǵyn týraly qorǵanys mınıstri Nurlan Ermekbaev tekserdi. Áńgimelesý barysynda ol áskerı qyzmetshilerdiń Qazaqstan azamattarynyń densaýlyǵy men amandyǵyn saqtaýda atqaratyn jumystarynyń mańyzdy ári aýqymdy ekendigin aıtyp ótti.
Nurlan Ermekbaev sarbazdar men serjanttarǵa ınfeksııaǵa qarsy sharalardyń baqylaýǵa alynǵandyǵyn jáne de bul iste ustamdylyq tanytý qajetigine toqtaldy. Sondyqtan da qıyn kezeńde respýblıka jurtshylyǵyna kómekke kelgen sarbazdardyń isi árqashan da joǵary baǵalanatyndyǵyn jetkizdi.
Mundaı tótenshe jaǵdaı kezinde áskerı qyzmetshiler óz densaýlyqtarynyń qaýipsizdigine asa mán berýi kerek. Bir jaýyngerdiń syrqaty búkil áskerı bólimniń jaýyngerlik ázirligine nuqsan keltirýi múmkin. Sondyqtan da áskerıler barlyq sanıtarlyq-gıgıenalyq normalaryn qatań saqtap, indettiń alǵashqy belgileri anyqtalǵan kezde basshylyqqa jedel túrde baıandaý qajettigi eskertildi.
Áskerılerdiń fızıkalyq belsendiligimen qatar, jeke quramnyń durys tamaqtanýy, dárýmenderdi ýaqytyly qabyldap otyrýy, kıimderiniń der kezinde arnaıy quraldarmen tazalanyp otyrýy men jeke gıgıenalyq talaptardy saqtaý máselesi tapsyryldy. Sondaı-aq, jumys barysynda eritindini daıyndaý ádisi, ekologııalyq zalal keltirmeýge baılanysty saqtyq sharalary qatań saqtalýy tıis. Áskerılerge dezınfeksııalaýǵa jatatyn nysandar men aýmaqtardy tolyqtaı óńdeý men quraldardy aýystyrý, jóndeý jumystaryn júrgizý máseleleri de baqylaýda bolýy tıistigi eskertildi.
Qala nysandaryn kún-tún demeı dezınfeksııalaýǵa, sonymen qatar qala mańyna jaqyn ornalasqan aýyl aımaqtardy óńdeý jumysyna qatysqan áskerı qyzmetshilerge Qorǵanys vedomstvosynyń basshysy alǵysyn bildirdi.
