Betperdeler óńirdegi aýyl, qala turǵyndaryna, áleýmettik az qamtylǵan otbasylarǵa, dárihanalarǵa jáne mektep qyzmetkerleri men oqýshylarǵa tegin taratyldy. Bul ıgi iske oblys kóleminde jalpy 1980 oqytýshy óz erkimen qatysqan. «О́zimizdi ǵana oılamaı jaqyndarymyzǵa, áleýmettik jaǵdaıy tómen otbasylarǵa da qamqorlyq tanytqanymyz durys. Osy rette betperdeniń jetispeýshiligin bilgen soń áriptesterimizben aqyldasyp, betperde tigýdi qolǵa aldyq. El basyna kún týǵan kezde qol qýsyryp otyrmaı, tyǵyryqtan shyǵýdyń joldaryn oılastyryp, ony iske asyrý árbir jannyń azamattyq boryshy dep bilemiz», deıdi Kentaý qalasyndaǵy B.Momyshuly atyndaǵy jalpy orta mektebiniń muǵalimi Aıgúl Arystanbekova. Atalmysh mektep qyzmetkerleri 22-30 naýryz aralyǵynda óz erikterimen kezekshilikke túsip, bir kúnde shamamen 2-2,5 myń dana betperde daıyndaǵan. Ustazdardyń ıgi bastamasynan habardar bolǵan qala turǵyndary da óz úılerinde betperde tigip, ortaq qorǵa úles qosqan.
Túrkistan oblysy
