Epıdemıolog mamandar tarapynan búgin tirkelgen aýrý oshaqtarynda zalalsyzdandyrý, baılanysta bolǵandardy tabý jáne oqshaýlaý boıynsha epıdemııaǵa qarsy is-sharalar uıymdastyrylǵan. Infeksııa tabylǵan Jetisaı aýdanyndaǵy Ábdihalyq aýyly men Jetisaı qalasyndaǵy móltek aýdanda karantın jarııalandy.
Oblys ákimi halyqqa úndeýinde Jetisaı aýdanyna dezınfeksııa, densaýlyq saqtaý, áleýmettik qorǵaý salasynan arnaıy mamandardan qurylǵan mobıldi top jiberilgenin málim etti. Qosymsha kómek retinde medısınalyq jabdyqtar men kólikter daıyndalǵan. Oblystyń ózge aýdandarynan ınfeksıonıst jáne reanımotologtardan quralǵan 6 brıgada Jetisaıǵa attanǵan. Oblystyń bas ınfeksıonıst dárigeri aýdanda osy sharalarǵa basshylyq etedi. Kerekti tósek-oryndar, gospıtaldar tolyq daıyn. Sondaı-aq oblys ákimi aýdan ákimine jáne tıisti organdarǵa eldi mekender shekarasyna blok-beketter qoıýdy tapsyrǵanyn málimdedi. Tótenshe jaǵdaı rejımin buzǵan azamattar zań aıasynda jaýapqa tartylatynyn eskertti. «Aýdanda ınfeksııa oshaǵy men qoǵamdyq oryndarda aýqymdy dezınfeksııa jumystary júrgiziledi. Bul óńirde indettiń taralý qarqyny óte joǵary. Osy rette oblys turǵyndaryn tótenshe jaǵdaıǵa baılanysty qabyldanǵan sharalarǵa túsinistikpen qarap, tıisti tártiptik sharalardy saqtaýǵa, dárigerlerdiń nusqaýlyqtaryn buljytpaı oryndaýǵa shaqyramyn», dedi oblys ákimi úndeýinde.
Vırýstyń taralýyn boldyrmaý maqsatynda oblys aýmaǵynda barlyq azamattar medısınalyq betperde kıip júrýi tıis. Dúkender men qoǵamdyq oryndarda betperdesiz júrýge tyıym salynady. Turǵyndar úıden tek qana azyq-túlik, dári-dármek alýǵa nemese jumysqa barý úshin shyǵýy kerek. Otbasylyq merekeler men toı-jıyndardy ótkizýge qatań tyıym salynady. Sondaı-aq, О́mirzaq Shókeev turǵyndardy áleýmettik jelilerdi sharlaǵan ártúrli aqparattarǵa senbeı, memlekettik organdar taratqan resmı málimetterge ǵana mán berýge shaqyrdy.
Túrkistan oblysy
