Irge kótergenine sanaýly jyldar ǵana bolǵan Nazarbaev ýnıversıtetinde qazir 4 myńnan astam stýdent bilim alady eken. Endi olardyń qataryn taldyqorǵandyq talapty jastar tolyqtyrady. 12-synypta oqıtyn Ernar О́mirzaqov, Roman Soı, Ásemaı Almasbekqyzy, Alýa Beısenbekova, Qazbek Qabilet jáne Aıym Jumabaevalar fızıka-matematıka baǵytynda bilim beretin zııatkerlik mekteptiń maqtanyshtary. Halyqaralyq, respýblıkalyq, mekteparalyq olıpıa jarystarynda únemi top jaryp júrgen oqýshylar mekteptiń qoǵamdyq ómirine de belsene aralasady.
- «Adamdy arman ósiredi» deıdi ǵoı, men bolashaqta Birikken Ulttar Uıymynyń hatshylyǵynda jumys istegim keledi. Osy maqsatqa qol jetkizý úshin oqýda úzdik bolýym kerek. Mektep qabyrǵasynda ony dáleldeýge tyrystym. Armanymnyń alǵashqy baspaldaǵyna shyqtym dep oılaımyn. Nazarbaev ýnıversıtetine shaqyrtý alyp, grant ılengenimde qatty qýandym. Endi bilim alýdy «Saıasattaný men halyqaralyq qatynastar» fakýltetinde jalǵastyrsam degen oıym bar, - deıdi Taldyqorǵan qalasyndaǵy Nazarbaev zııatkerlik mektebiniń 12-synyp oqýshysy Aıym Jumabaeva.
