Indetti Jetisaıǵa «jetkizgen» azamatsha 21 naýryz kúni Nur-Sultan qalasynan Pavlodar-Qyzylorda baǵytyndaǵy poezben shyǵyp, Qaraǵandy qalasyna toqtaǵan. Alty saǵat vokzalda otyrǵan ol, ary qaraı Petropavl-Qyzylorda baǵytyndaǵy poezben Shymkent qalasyna kelgen. Sóıtip jeke kólikpen Jetisaı qalasyna jetken. Naýryzdyń 27-inen qyzýy kóterilip aýyrǵan ol aýrýhanaǵa 30-yna qaralǵan. Alǵashqyda naýqaspen qarym-qatynasta bolǵan 16 adam anyqtalǵan-dy. Keıin bul san óse túsken. Naýqaspen baılanysta bolǵan adamdardy tekserý barysynda, otbasynyń 3 múshesiniń saraptamasy oń nátıje berdi. Al COVID-19 saraptamasy oń qorytyndy bergen besinshi jaǵdaı Almaty qalasyna issaparmen baryp kelgen azamattan anyqtaldy. Túrkistan oblysy Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nurbek Nyshanov qazirgi tańda naýqastar tolyq dárigerlerdiń baqylaýyna alynǵanyn, jaǵdaılary qanaǵattanarlyq dárejede ekenin habarlady. Qarym-qatynasta bolǵan barlyq adamǵa stasıonarlyq oqshaýlaý sharalary júrgizilgen. Tıisti hattamaǵa sáıkes, emdik sharalar jasalynýda.
Túrkistan oblysynyń ákimi О́mirzaq Shókeev óńirde oryn alǵan jaǵdaıǵa baılanysty turǵyndarǵa úndeý joldady. Epıdemıolog mamandar tarapynan tirkelgen aýrý oshaqtarynda zalalsyzdandyrý, baılanysta bolǵandardy tabý jáne oqshaýlaý boıynsha epıdemııaǵa qarsy is-sharalar uıymdastyrylǵan. Infeksııa tabylǵan Jetisaı aýdanyndaǵy Ábdihalyq aýyly men aýdan ortalyǵyndaǵy shaǵynaýdanda karantın jarııalandy. Oblys ákimi halyqqa úndeýinde Jetisaı aýdanyna dezınfeksııa, densaýlyq saqtaý, áleýmettik qorǵaý salasynan arnaıy mamandardan qurylǵan mobıldi top jiberilgenin málim etti. Qosymsha kómek retinde medısınalyq jabdyqtar men kólikter daıyndalǵan. Oblystyń ózge aýdandarynan ınfeksıonıst jáne reanımotologtardan quralǵan 6 brıgada Jetisaıǵa attanǵan. Oblystyń bas ınfeksıonıst dárigeri aýdanda osy sharalarǵa basshylyq etedi. Sondaı-aq oblys ákimi aýdan ákimine jáne tıisti organdarǵa eldi mekender shekarasyna blok-beketter qoıýdy tapsyrǵanyn málimdedi. Tótenshe jaǵdaı rejımin buzǵan azamattar zań aıasynda jaýapqa tartylatynyn eskertti. «Aýdanda ınfeksııa oshaǵy men qoǵamdyq oryndarda aýqymdy dezınfeksııa jumystary júrgiziledi. Bul óńirde indettiń taralý qarqyny óte joǵary. Osy rette oblys turǵyndaryn tótenshe jaǵdaıǵa baılanysty qabyldanǵan sharalarǵa túsinistikpen qarap, tıisti tártiptik sharalardy saqtaýǵa, dárigerlerdiń nusqaýlyqtaryn buljytpaı oryndaýǵa shaqyramyn», dedi oblys ákimi úndeýinde. Sondaı-aq О́mirzaq Shókeev turǵyndardy áleýmettik jelilerdi sharlaǵan ártúrli aqparattarǵa senbeı, memlekettik organdar taratqan resmı málimetterge ǵana mán berýge shaqyrdy. Búginde ınfeksııa oshaǵynda tıisti departament, basqarma mamandarymen jáne oblystyq ınfeksıonıst dárigermen epıdemıologııalyq zerdeleý jumystary jáne indetke qarsy sharalar kesheni júrgizilýde.
Aıta ketelik, oblysta Covid-19 koronavırýstyq ınfeksııadan qolaısyz elderden kelgen 495 adam monıtorıngtik baqylaýǵa alynǵan. Onyń 9-y 1 «a» sanatyndaǵy, al 486 adam 1 «b» sanatyndaǵy elderden kelgen.
Túrkistan oblysy
