Qazaqstan men AQSh arasyndaǵy Konsýldyq artyqshylyqtar men ımmýnıtetter týraly kelisim qaraldy

Syrtqy ister mınıstriniń orynbasary Erjan Ashyqbaevtyń aıtýynsha, kelisim qolaıly jaǵdaı jasaý úshin, sondaı-aq konsýldyq laýazymdy adamdar men qyzmetkerlerdi, sondaı-aq olardyń otbasy múshelerin qorǵaýdy kúsheıtý maqsatynda ázirlengen. Qazirgi ýaqytta AQSh aýmaǵynda Qazaqstannyń eki Bas konsýldyǵy Nıý-Iork jáne San-Fransıskoda jumys istep keledi. Ekinshisi ótken jyldyń basynda ashylǵan bolatyn. AQSh-tyń Almatydaǵy Bas konsýldyǵy óz kezeginde Ortalyq Azııadaǵy AQSh-qa arnalǵan birden-bir óńirlik hab qyzmetin atqarýda.

Senator Muhtar Qul-Muhammed kelisimdi ratıfıkasııalaý konsýldyq mekemelerge, konsýldyq laýazymdy adamdarǵa, konsýldyq qyzmetshilerine jáne olardyń otbasy múshelerine 1961 jylǵy Dıplomatııalyq qatynastar týraly Vena konvensııasynda kózdelgen kólemde dıplomatııalyq ókildikterge, dıplomatııa agentterine, ákimshilik jáne tehnıkalyq personalǵa, sondaı-aq olardyń otbasy múshelerine tıisti artyqshylyqtar men ımmýnıtetter berýge múmkindik beretinin atap ótti.

Mysaly, kelisimdi ratıfıkasııalaı otyryp, buryn kózdelmegen, dıplomatııalyq qatynastar týraly Vena konvensııasynda aıtylǵannan basqa jaǵdaılarda Taraptardyń konsýldyq adamdary dıplomatııalyq agenttermen teń dárejede qylmystyq ıýrısdıksııadan ımmýnıtetti, sondaı-aq azamattyq jáne ákimshilik ıýrısdıksııadan ımmýnıtetti paıdalana alady.

Senatorlar talqylaýdy qorytyndylaı kelip, zań jobasy qabyldanǵanda azamattardyń múddelerin bildirý men qorǵaýdyń tıimdiligi arta túsetinin, sondaı-aq Qazaqstan Respýblıkasy men Amerıka Qurama Shtattary arasyndaǵy ózara yntymaqtastyq pen dostyq qarym-qatynastardy nyǵaıatynyn atap ótti. Qujat Palatanyń qaraýyna jiberildi.