Osy jaǵdaıdy eskere otyryp, aldaǵy sáýir-jeltoqsan aılarynda munaıdyń ortasha baǵasy bir barreline 20 dollar deńgeıinde belgilenip otyr. Dollardyń eseptik baǵamy 440 teńge deńgeıinde jáne jyldyq ınflıasııa 9-11% aralyǵynda esepke alynǵan.
Baǵanyń tómendeýi aıasynda munaı óndirý boıynsha boljam 4 mln-ǵa 86 mln tonnaǵa deıin azaıtyldy. Bul taý-ken ónerkásibi óndirisiniń tómendeýine ákeledi. Sonymen qatar óńdeý ónerkásibinde, aýyl sharýashylyǵynda, qurylysta jáne kórsetiletin qyzmetter sektorynda, onyń ishinde saýdada buǵan deıin maquldanǵan ósý qarqyndarymen salystyrǵanda tómendeý kútilýde.
Sonymen qatar eksport 16,3 mlrd dollarǵa, ımport 7,5 mlrd dollarǵa tómendegen. Joǵaryda atalǵan faktorlardy eskere otyryp, jalpy ishki ónimniń 0,9%-ǵa tómendeýi kútilýde.
Soǵan saı túzetilgen makroekonomıkalyq boljamnyń negizinde 2020 jylǵa arnalǵan respýblıkalyq bıýdjet parametrleriniń boljamy naqtylandy.
Respýblıkalyq bıýdjettiń kiristeri transfertterdi esepke almaǵanda 2020 jyly 6 414,1 mlrd teńge kóleminde baǵalanýda, bul bekitilgen josparǵa qaraǵanda 1 672,3 mlrd teńgege az.
Buǵan qosa, eldegi karantın jaǵdaıynda qosylǵan qun salyǵy, shıki munaıǵa eksporttyq keden bajy jáne tabıǵı resýrstardy paıdalanǵany úshin túsetin túsimder kemigendikten el qazynasyna túsetin qarajat aıtarlyqtaı azaıýy múmkin. R.Dálenov bıýdjet kiristeriniń kútiletin tapshylyǵyn jabý jáne daǵdarysqa qarsy sharalar keshenin qarjylandyrý úshin 2020 jyly Ulttyq qordan kepildendirilgen transfertti 2 070 mlrd teńgege, ıaǵnı 4 770 mlrd teńgege deıin ulǵaıtýdy usyndy.
